Police Medal for Outstanding Service বঁটা লাভ কলিয়াবৰৰ দুই আৰক্ষী বিষয়াৰ

অসম আৰক্ষী দিৱস(Assam Police Day) ৷ ৰাজ্যৰ প্ৰায় 3.3 কোটি জনতাৰ জীৱন আৰু সম্পত্তিৰ সুৰক্ষা দি থকা আৰক্ষী বিষয়াসকলৰ বাবে এই দিৱসটো উদযাপন কৰা হয় ৷ জনসাধাৰণৰ সুৰক্ষাৰ হকে ৰাজ্যৰ প্ৰতিটো কোণতে নিয়োজিত এই খাকী পোছাক পৰিহিত বিষয়াসকলৰ অৱদান অতুলনীয় ৷ এই অৱদানৰ বাবেই কলিয়াবৰ মহকুমা আৰক্ষী বিষয়া মৃণ্ময় দাস আৰু জখলাবন্ধা আৰক্ষী থানাৰ ভাৰপ্ৰাপ্ত আৰক্ষী বিষয়া নিপু কলিতাই লাভ কৰিছে Chief Minister's Police Medal for Outstanding Service- 2020 ৰ বিশেষ সন্মান ৷

কলিয়াবৰ , 3 অক্টোবৰ :অসম তথা কলিয়াবৰবাসীৰ বাবে এক সু-খবৰ ৷ অসম আৰক্ষীৰ বিৰুদ্ধে বিভিন্ন সময়ত বিভিন্ন অভিযোগ উঠি অহাৰ মাজতে কলিয়াবৰলৈ গৌৰৱ কঢ়িয়াই আনিছে দুই আৰক্ষী বিষয়াই ৷ কাজিৰঙা ৰাষ্ট্ৰীয় উদ্যানৰ গঁড়ৰ চোৰাং চিকাৰীৰ বিৰুদ্ধে দেখুওৱা সাহসীকতাৰ বাবে সফলতাৰ স্বীকৃতি লাভ কৰিছে কলিয়াবৰৰ দুই আৰক্ষী বিষয়াই ৷

কলিয়াবৰ মহকুমা আৰক্ষী বিষয়া মৃণ্ময় দাস আৰু জখলাবন্ধা আৰক্ষী থানাৰ ভাৰপ্ৰাপ্ত আৰক্ষী বিষয়া নিপু কলিতাই লাভ কৰিছে অসম চৰকাৰৰ মুখ্যমন্ত্ৰীৰ এই বিশেষ সন্মান ৷ মুখ্যমন্ত্ৰীৰ এই বিশেষ সন্মান লাভ কৰি স্বাভাৱিকতে উৎফুল্লিত হৈ পৰিছে দুয়োগৰাকী আৰক্ষী বিষয়া । আৰক্ষী দিৱসৰ দিনা অৰ্থাৎ 1 অক্টোবৰৰ দিনা নগাঁও জিলাৰ আৰক্ষী অধীক্ষক আনন্দ মিশ্ৰই দুয়োগৰাকী আৰক্ষী বিষয়াক প্ৰদান কৰে এই সন্মান ।

উল্লেখ্য যে, কাজিৰঙা ৰাষ্ট্ৰীয় উদ্যানৰ বিশেষকৈ বাগৰি আৰু বুঢ়াপাহাৰ বনাঞ্চলত গঁড় হত্যা ৰোধৰ ক্ষেত্ৰত বিশেষ ভূমিকা গ্ৰহণ কৰি আহিছে দুই আৰক্ষী বিষয়াই । দুই আৰক্ষী বিষয়াৰ কৰ্ম দক্ষতাৰ ফলতে বুঢ়াপাহাৰ আৰু বাগৰি বনাঞ্চলত এই পৰ্যন্ত চোৰাং চিকাৰীয়ে এটাও গঁড় হত্যা কৰিবলৈ সক্ষম হোৱা নাই । যাৰ ফলত দুই আৰক্ষী বিষয়াক Chief Minister's Police Medal for Outstanding Service- 2020 সন্মানেৰে সন্মানিত কৰা হৈছে ৷

লগতে পঢ়ক:গুৱাহাটীৰ বিমান বন্দৰত উপ-ৰাষ্ট্ৰপতি ভেংকায়া নাইডুক উষ্ম আদৰণি