নগাঁৱৰ নমাটিৰ পথ দুৰ্ঘটনাত শিক্ষকৰ মৃত্যু

সঘনাই দুৰ্ঘটনা সংঘটিত হোৱা অঞ্চলটোত নাই গতিৰোধকৰ ব্যৱস্থা ৷ গড়কাপ্তানি বিভাগৰ গাফিলতিত সঘনাই দুৰ্ঘটনা সংঘটিত হোৱাৰ অভিযোগ ৰাইজৰ ৷

নগাঁও, 28 জুন: নগাঁও-মৰিগাঁও সংযোগী মূল পথ নমাটিত বৃহস্পতিবাৰে সংঘটিত হয় শোকাৱহ পথ দুৰ্ঘটনা । দুৰ্ঘটনাটোত থিতাতে নিহত হয় অঞ্চলটোৰে এগৰাকী শিক্ষক । জাজৰি আৰক্ষী থানাৰ অন্তৰ্গত নমাটি গাঁৱৰ নিৱাসী শিক্ষক জ্যোতিৰ্ময় বৰুৱাই মটৰ চাইকেলেৰে ৰাস্তা পাৰ হোৱাৰ সময়তে নগাঁৱৰ পৰা মৰিগাঁও অভিমুখী তীব্ৰবেগী AS21F7822 নম্বৰৰ এখন ৱেগনাৰ গাড়ীয়ে মহতিয়াই নিয়ে ।

ৱেগনাৰৰ খুন্দাত দূৰৈত চিটিকি পৰা জ্যোতিৰ্ময় বৰুৱাক সংকটজনক অৱস্থাত দুৰ্ঘটনা সংঘটিত কৰা বাহনখনেৰেই নগাঁৱৰ জিডি হাস্পতালত ভৰ্তি কৰোৱা হয় যদিও, চিকিৎসকে মৃত ঘোষণা কৰে লোকজনক । উল্লেখ্য যে, নৱনিৰ্মিত নগাঁও-মৰিগাঁও সংযোগী মূলপথৰ ব্যস্ততাপূৰ্ণ চাৰিআলি-তিনিআলিত এতিয়ালৈকে গড়কাপ্তানি বিভাগে গতিৰোধকৰ ব্যৱস্থা নকৰাৰ বাবে সঘনাই দুৰ্ঘটনা সংঘটিত হোৱাৰ অভিযোগ স্থানীয় ৰাইজৰ ৷