নগাঁও আৰক্ষীৰ সফলতা : বৃহৎ পৰিমাণৰ অস্ত্ৰসহ আটক ডকাইতৰ দল

সোমবাৰে নিশা নগাঁও আৰক্ষীৰ দুটা দলে জিলাখনৰ বঢ়মপুৰ আৰু নগাওঁ চহৰত অভিযান চলাই আটক কৰে সাতজনীয়া ডকাইতৰ দল ৷ পুৰণিগুদামৰ ৰিলায়েঞ্চ তেল ডিপোত সংঘটিত ডকাইতিত জড়িত আছিল দলটো ৷

নগাঁও, নৱেম্বৰ 26 : বৃহৎ পৰিমাণৰ অস্ত্ৰসহ নগাঁও আৰক্ষীৰ জালত পৰিল কুখ্যাত ডকাইতৰ দল ৷ গোপন সূত্ৰৰ পম খেদি সোমবাৰে নিশা নগাঁও আৰক্ষীৰ দুটা দলে জিলাখনৰ বঢ়মপুৰ আৰু নগাওঁ চহৰত অভিযান চলাই আটক কৰে ডকাইতৰ দলটোক ৷ এই অভিযানৰ নেতৃত্ব দিছিল নগাঁও আৰক্ষীৰ বিশেষ শাখাৰ উপ আৰক্ষী অধীক্ষক জন দাস আৰু কলিয়াবৰ মহকুমা আৰক্ষী বিষয়া মৃণ্ময় দাসে ৷ নগাঁও জিলাৰ কুখ্যাত অপৰাধী ৰাজীৱ বৰদলৈৰ বঢ়মপুৰৰ বাসগৃহত অভিযান চলাই আৰক্ষীয়ে জব্দ কৰে এটা .22 পিস্তল, এটা পুতলা পিস্তল, এখন দা, দুটা সজীৱ গুলী, এটা চেটেলাইট ফোনৰ লগতে নগদ পাঁচ হাজাৰ টকা ৷

বৃহৎ পৰিমাণৰ অস্ত্ৰসহ আটক ডকাইতৰ দল

উল্লেখ্য যে, এই ডকাইতৰ দলটোৱে যোৱা 16 নৱেম্বৰত পুৰণিগুদামৰ ৰিলায়েঞ্চ তেল ডিপোত সংঘটিত কৰিছিল ডকাইতি কাণ্ড ৷ দলটোৱে তেল ডিপোটোৰ পৰা লুটি নিয়ে চিচি কেমেৰা, এটা এল চি ডি, নগধ ধনকে ধৰি বহু সামগ্ৰী ৷ সোমবাৰে নিশা পুনৰ ডকাইতৰ দলটোৱে ডকাইতিৰ পৰিকল্পনা কৰাৰ খবৰ পাই দলটো ধৰিবলৈ তৎপৰ হৈ পৰে নগাঁৱৰ আৰক্ষী অধীক্ষক শংকৰব্ৰত ৰায় মেধি ৷

আৰক্ষীয়ে সুসজ্জিত দলসহ জন দাস আৰু মৃণ্ময় দাসৰ নেতৃত্বত ডকাইতৰ দলটোৰ বিৰুদ্ধে অভিযান আৰম্ভ কৰে ৷ অভিযানত আৰক্ষীৰ জালত পৰে ডকাইতৰ দলটোৰ মূল মাষ্টাৰ মাইণ্ড ৰাজীৱ বৰদলৈ, বঢ়মপুৰৰ পৰা দ্বীপজ্যোতি শৰ্মা, খনজ্যোতি হাজৰিকা, হেমন্ত হাজৰিকা, কামপুৰৰ পৰা দ্বীপন বৰা, বামুনীৰ মিনহাজ আহমেদ , বৰভেটিৰ জাকিৰ শ্বেখ ৷ এই দলটোৰ আটকৰ পাচত আৰু অধিক অপৰাধীক আটক কৰিবলৈ সক্ষম হ'ব বুলি আশা ব্যক্ত কৰিছে নগাঁও জিলাৰ আৰক্ষী অধীক্ষকে ৷

লগতে পঢ়ক : ওৰাঙত পত্নীয়ে হত্যা কৰিলে স্বামীক, দেৰগাঁৱত মৰিয়াই মৰিয়াই হত্যা এজনক