নগাওঁ মহাবিদ্যালয়তো জ্বলিছে কেব বিৰোধী জুইঃ আন্দোলনত অংশ ল'লে প্ৰাক্তন মুখ্যমন্ত্ৰী প্ৰফুল্ল কুমাৰ মহন্তই

শনিবাৰে কেবৰ বিৰুদ্ধে ৰাজপথলৈ ওলাই প্ৰতিবাদ সাব্যস্ত কৰে নগাওঁ মহাবিদ্যালয়ৰ ছাত্ৰ-ছাত্ৰীয়ে ৷ প্ৰতিবাদী ছাত্ৰ-ছাত্ৰীসকলে কেব বিৰোধী শ্ল’গানেৰে উত্তাল কৰি তোলে নগাওঁ চহৰ ৷ প্ৰাক্তন মুখ্যমন্ত্ৰী প্ৰফুল্ল কুমাৰ মহন্তয়ো ছাত্ৰ-ছাত্ৰীৰ এই প্ৰতিবাদত অংশগ্ৰহণ কৰে ৷ ইতিমধ্যে নগাওঁ মহাবিদ্যালয়ত অনুষ্ঠিত হ’বলগীয়া হীৰক জয়ন্তী অনুষ্ঠানত বিধায়ক ৰূপক শৰ্মাৰ প্ৰৱেশ নিষিদ্ধ কৰিছে ছাত্ৰ-ছাত্ৰীসকলে ৷

নগাঁৱ,7 ডিচেম্বৰঃ ৰাজ্যৰকটন বিশ্ববিদ্যালয়ৰ ছাত্ৰ-ছাত্ৰীৰ পিছত প্ৰতিবাদত নামিল নগাওঁ মহাবিদ্যালয়ৰ ছাত্ৰ-ছাত্ৰী । শনিবাৰে কেবৰ বিৰুদ্ধে ৰাজপথত ওলাই প্ৰতিবাদ সাব্যস্ত কৰে নগাওঁ মহাবিদ্যালয়ৰ ছাত্ৰ-ছাত্ৰীয়ে ৷ প্ৰতিবাদী দলটোৱে কেব বিৰোধী শ্ল’গানেৰে উত্তাল কৰি তোলে নগাওঁ চহৰ। উক্ত প্ৰতিবাদী কাৰ্যসূচীত স্থানীয় বহুকেইখন কলেজে অংশগ্ৰহণ কৰে ৷ মহাবিদ্যালয়ৰ সন্মুখৰ মূলপথটি অধিকাৰ কৰি পথৰ ওপৰতে শুই পৰে একাংশ ছাত্ৰ ৷ আৰক্ষীয়ে প্ৰতিবাদী দলটোক বাধা প্ৰদানৰ চেষ্টা কৰে যদিও ব্যৰ্থ হয় ৷

ইপিনে পথটোৰে যোৱা প্ৰাক্তন মুখ্যমন্ত্ৰী প্ৰফুল্ল কুমাৰ মহন্তৰ কনভয় বিজেপি নেতাৰ বুলি ভাবি ঘেৰাও কৰাৰ চেষ্টা কৰে একাংশ প্ৰতিবাদকাৰীয়ে । অৱশ্যে মহন্তয়ো ছাত্ৰ-ছাত্ৰীৰ এই প্ৰতিবাদত অংশগ্ৰহণ কৰে । অসম আন্দোলনৰ পটভূমি নগাওঁত কেবৰ বিৰুদ্ধে ছাত্ৰ-ছাত্ৰীয়ে গ্ৰহণ কৰা এই পদক্ষেপক আদৰণি জনায় প্ৰাক্তন মুখ্যমন্ত্ৰীগৰাকীয়ে ৷ আনহাতে, প্ৰতিবাদস্থলীত এজন ছাত্ৰই তেজেৰে শ্লোগান লিখি চৰকাৰক হুংকাৰ প্ৰদান কৰে ৷ শৰীৰত শেষ বিন্দু তেজ থকালৈ এই আন্দোলন চলিব বুলি প্ৰতিবাদী ছাত্ৰ-ছাত্ৰী সকলে মন্তব্য কৰে ৷

ইতিমধ্যে নগাওঁ মহাবিদ্যালয়ত অনুষ্ঠিত হ’বলগীয়া হীৰক জয়ন্তী অনুষ্ঠানত বিধায়ক ৰূপক শৰ্মাৰ প্ৰৱেশ নিষিদ্ধ কৰিছে ছাত্ৰ-ছাত্ৰীসকলে ৷ তদুপৰি দীর্ঘ সময়জোৰা প্ৰতিবাদৰ অন্তত দলটোৱে দেশৰ প্ৰধানমন্ত্ৰী নৰেন্দ্ৰ মোদী,অমিত শ্বাহ,মুখ্যমন্ত্ৰী সোণোৱাল আৰু হিমন্ত বিশ্ব শৰ্মাৰ প্ৰতীকী শৱদেহ লৈ শ্মশান যাত্ৰা কৰে । প্ৰায় তিনি কিল’মিটাৰৰ যাত্ৰাৰ অন্তত নগাওঁ নেহৰুবালিত ধৰ্মীয় ৰীতি-নীতিৰে সৎকাৰ কৰা হয় নেতা কেইজনৰ শৱদেহ । উল্লেখ্য যে, বিধায়ক ৰূপক শৰ্মাৰ ফটো সম্বলিত হৰ্ডিং এখন ফালি দিয়ে একাংশ প্ৰতিবাদকাৰীয়ে । মুঠৰ ওপৰত প্ৰতিবাদকাৰীসকলে কোনো কাৰণতে নাগৰিকত্ব সংশোধনী বিধেয়কখন মানি নলয় বুলি দাবী জনায় ।

লগতে চাওকঃবিজেপিৰ বিৰুদ্ধে সৰৱ বিৰোধীৰ দলপতি দেৱব্ৰত শইকীয়া