ৰহাত ককায়েকৰ হাতত প্ৰাণ গ'ল ভায়েকৰ

ফুলগুৰিৰ পশ্চিম শালমাৰাত ককায়েকৰ হাতত প্ৰাণ হেৰুৱালে ভায়েকে ৷ মদ্যপান কৰাৰ ফলতে কাজিয়াৰ সূত্ৰপাত হোৱাৰ অভিযোগ উত্থাপন কৰিছে স্থানীয় ৰাইজে ৷ এই ঘটনাৰ লগত জড়িত এজনক আটক কৰিছে আৰক্ষীয়ে ৷

ৰহা,5 জুন:নগাঁৱৰ ফুলগুৰিৰ পশ্চিম শালমাৰাত সংঘটিত হৈছে এক অঘটন ৷ ককায়েকৰ হাতত প্ৰাণ হেৰুৱালে ভায়েকে ৷ পাৰিবাৰিক কন্দলৰ ফলতে এই অঘটন সংঘটিত হোৱাৰ অভিযোগ উত্থাপন কৰিছে স্থানীয় ৰাইজে ৷

প্ৰাপ্ত তথ্য অনুসৰি, মদ্যপান কৰি পশ্চিম শালমাৰাৰ কেশৱ কাকতি আৰু ৰজত কাকতিৰ মাজত কাজিয়াৰ সূত্ৰপাত ঘটে ৷ জানিব পৰা মতে, সম্বন্ধত কেশৱ কাকতি আৰু ৰজত কাকতি দুয়ো ভাই-ককাই ৷ এই কাজিয়াৰ পৰিণতিস্বৰূপে ককায়েকে চুৰিৰে আঘাত কৰে কেশৱ কাকতিক ৷ ককায়েকৰ প্ৰহাৰত মৃত্যু হয় কেশৱ কাকতি নামৰ যুৱকজন ৷

ৰহাৰ পশ্চিম শালমাৰাত ককায়েকৰ হাতত প্ৰাণ গ'ল ভায়েকৰ

উল্লেখ্য যে, ঘৰৰ চোতালতে ৰজত কাকতিয়ে ভাতৃ কেশৱক চুৰিৰে পেটত আঘাত কৰে যাৰ ফলত গুৰুতৰভাৱে আহত হয় কেশৱ ৷ পৰিয়ালৰ লোকে ততাতৈয়াকৈ কেশৱক চিকিৎসালয়লৈ নিয়ে যদিও আদবাটতে মৃত্যু ঘটে ৷ পৰৱৰ্তী সময়ত ঘটনাস্থলীত উপস্থিত হয় আৰক্ষী ৷ আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে ৷ এই ঘটনাৰ লগত জড়িত ৰজত কাকতিক আৰক্ষীয়ে আটক কৰি আৰম্ভ কৰিছে তদন্ত ৷

লগতে পঢ়ক: সৰ্থেবাৰীত আটক ড্ৰাগছ মাফিয়া