চামগুৰি, 18 জুন : ক'ভিডৰ বৰ্তমানৰ পৰিস্থিতিৰ ওপৰত ভিত্তি কৰি নগাঁও জিলা প্ৰশাসন অধিক সতৰ্ক হৈ থকা সময়তে শুকুৰবাৰে কন্টেইনমেন্ট জ'ন(containment zone)ত থকা পৰিয়ালৰ সৈতে মত বিনিময় কৰে বিধায়ক ৰূপক শৰ্মাই ৷ বিধায়ক গৰাকীয়ে পৰিয়াল সমূহে পাবলগীয়া সা-সুবিধাৰ বুজ লোৱাৰ লগতে স্বাস্থ্যৰ স্থিতি সন্দৰ্ভতো বুজ লয় ৷
জানিব পৰা মতে নগাঁও সদৰ সমষ্টিৰ অন্তৰ্গত ডাকৰঘাট গাঁও পঞ্চায়তৰ অধীনৰ ফেটাচুক অঞ্চলৰ কন্টেইনমেন্ট জ'নত থকা পৰিয়াল সমূহৰ সদস্য সকলৰ সৈতে মত বিনিময় কৰে সমষ্টিৰ বিধায়ক ৰূপক শৰ্মাই ৷ মত বিনিময় কৰা সময়ত প্ৰতিটো পৰিয়ালক সকলো প্ৰকাৰৰ সহায় সহযোগিতা আগবঢ়োৱাৰ আশ্বাস দিয়ে বিধায়ক গৰাকীয়ে ৷
ইফালে বিধায়ক ৰূপক শৰ্মাই নগাঁও চহৰৰ আমোলাপট্টিস্থিত সঙ্গিন সংঘৰ কাৰ্যালয়ত স্থাপন কৰা ক’ভিড ১৯ৰ ভেকচিন শিৱিৰতো উপস্থিত হৈ সামগ্ৰীক পৰিস্থিতি বুজ লোৱাৰ লগতে ভেকচিন প্ৰদান কাৰ্যসূচী পৰ্যবেক্ষণ কৰে । উল্লেখ্য যে, ক'ভিড ভেকচিন প্ৰদানৰ দৰে সঙ্গিন সংঘই গ্ৰহণ কৰা জনকল্যানমূলক কাৰ্যসূচীক আদৰণি জনাই বিধায় ৰূপক শৰ্মাই ৷