বঢ়মপুৰ, 4 ছেপ্টেম্বৰ :কামপুৰত জালিয়াতিৰে মৃত লোকৰ নামত থকা মাটি ক্ৰয় কৰি আৰক্ষী জালত পৰিছে প্ৰৱঞ্চক ৷ যিসময়ত বিভিন্ন চৰকাৰী কাৰ্যালয়ৰ পৰা বৰ্তমানৰ মুখ্যমন্ত্ৰীগৰাকীয়ে দালাল মুক্ত কৰাৰ কথা কৈ আহিছে, তেনে সময়তে কামপুৰ উপ পঞ্জীয়কৰ কাৰ্যালয়ত সংঘটিত হৈছে এক নাভূত নাশ্ৰুত ঘটনা । প্ৰবঞ্চনা আৰু জালিয়াতিৰে মৃত ব্যক্তিৰ নামত থকা মাটি বিক্ৰী কৰে এটি চক্ৰই ।
উল্লেখ্য যে, কামপুৰৰ পাচনীজাৰৰ কৃষ্ণ লস্কৰ নামৰ এজন লোকে নিজৰ লগতে নৃপেন হাজৰিকা, পদুম শৰ্মা, বেবী গোঁহাই আৰু পদ্মকান্ত শইকীয়া নামৰ কেইবাজনো লোকৰ নামত কামপুৰ উপ-পঞ্জীয়কৰ কাৰ্যালয়ৰ পৰা ভুৱা চহীৰে জালিয়াতিৰ জৰিয়তে মাটি ক্ৰয়-বিক্ৰী কৰিছিল ৷ লগতে মাজৰআটি কিচামত থকা প্ৰভাত গোস্বামী নামৰ ব্যক্তিগৰাকীৰ 334, 316 দাগৰ আৰু আৰু 207, 413 ম্যাদী পট্টাৰ মাটি গৰাকীয়ে নজনাকৈয়ে বিক্ৰীও কৰিছিল ।
তাৎপৰ্যপূৰ্ণ বিষয় যে, মাটিৰ প্ৰকৃত মালিক প্ৰভাত গোস্বামী 2019 বৰ্ষৰ ফেব্ৰুৱাৰীত মৃত্যু হয় ৷ কিন্তু মাৰ্চ মাহত অভিযুক্ত কৃষ্ণ লস্কৰে মাটি বিক্ৰীৰ অনুমতি উলিয়াই বিক্ৰী কৰে মাটিসমূহ । ইপিনে প্ৰভাত গোস্বামীৰ পুত্ৰ কেইগৰাকীয়ে কামপুৰ চক্ৰ বিষয়া কাৰ্যালয়ত তেওঁলোকৰ মাটি সংক্ৰান্তীয় কাম কাজত আহি দেউতাকৰ নামত থকা মাজৰআটি কিচামৰ মাটিখিনি বিক্ৰী হোৱা বুলি জানিবলৈ পাই হতচকিত হৈ পৰে ।
নথি-পত্ৰত উল্লেখ থকা অনুসৰি, মাটিখিনি নৃপেন হাজৰিকা, পদ্মকান্ত শইকীয়া, পদুম শৰ্মা আৰু বেবী গোহাঁইক বিক্ৰী কৰে অভিযুক্ত কৃষ্ণ লস্কৰে । ইফালে বিবদমান এলেকাটোত অভিযুক্ত নৃপেন হাজৰিকাই এটা পকী ঘৰ নিৰ্মাণৰ কামো ইতিমধ্যে আৰম্ভ কৰিছে ।