কলিয়াবৰ, 11 নৱেম্বৰ : শৰৎ নেওচি নামিছে শীত ৷ ৰাষ্ট্ৰীয় উদ্যান কাজিৰঙাৰ শীতৰ সৌন্দৰ্য নেদেখিলে কল্পনাতীত ৷ ইতিমধ্যে কাজিৰঙা ৰাষ্ট্ৰীয় উদ্যান পৰ্যটকৰ বাবে মুকলি কৰা হৈছে ৷ পৰ্যটকৰ বাবে জীপ ছাফাৰী, হাতী ছাফাৰীৰে উদ্যানখন উপভোগ কৰাৰ সুন্দৰ ব্যৱস্থা আছে ৷ 37 নং ৰাষ্ট্ৰীয় ঘাইপথ অতিক্ৰম কৰি গৈ থাকোতে ৰাস্তাত গাড়ী ৰখাই কাজিৰঙাক এবাৰ চাই যোৱা কামটো সকলোৱে কৰে ৷ সেই বাটটোত অহা-যোৱা কৰোতে কেতিয়াবা হাতী,গঁড়, হৰিণা নিশ্চয়কৈ আপোনাৰ চকুত পৰিছে ৷ পুনৰ তেনে এক নান্দনিক দৃশ্য বন্দী হ’ল আমাৰ কেমেৰাত ৷
শৰতৰ বৰ্ষাহীন পৰিৱেশত কাজিৰঙা ৰাষ্ট্ৰীয় উদ্যানৰ সেউজী পৰিৱেশ ক্ৰমাৎ শুষ্ক হৈ পৰে । শীত অহালৈ কাজিৰঙাত তৃণ-লতাহীন এক মুকলি পৰিৱেশে বিৰাজ কৰে । পহু-গঁড়-ম'হ-হাতীৰ জাকে মুকলিত খাদ্য খাবলৈ আহি পৰ্যটকৰ চকুত সন্মুখতে ধৰা দিয়ে । কাজিৰঙা ৰাষ্ট্ৰীয় উদ্যানৰ দক্ষিণ দিশে পাৰ হৈ যোৱা ৩৭ নং ৰাষ্ট্ৰীয় ঘাইপথৰ উজনি-নামনিলৈ আহ-যাহ কৰা যাত্ৰীয়েও এনে মনোমুগ্ধকৰ দৃশ্যৰ সোৱাদ লয় । হাতীৰ জাকবোৰে এনে দিনতে কাজিৰঙাৰ বুকুত খাদ্যৰ অভাৱ হোৱাৰ বাবে খাদ্যৰ সন্ধানত ৰাষ্ট্ৰীয় পথ পাৰ হৈ সঘনাই গতি কৰে কাৰ্বি পাহাৰলৈ । ৰাষ্ট্ৰীয় পথেৰে দুয়ো দিশৰ পৰা অহা যাত্ৰীয়ে হাতীৰ জাকবোৰৰ দৃশ্য উপভোগ কৰি সন্তুষ্ট হয় ।