বঢ়মপুৰ,৮ ফেব্ৰুৱাৰী: উত্তৰাখণ্ডত সন্ধানহীন হোৱা কমল দাস আৰু অমৰজ্যোতি দাসৰ কামপুৰৰ উত্তৰ চাংচকীস্থিত বাসগৃহত শোকাকুল পৰিৱেশে বিৰাজ কৰিছে । পুত্ৰৰ খবৰ নাপাই অসহায় হৈ পৰিছে অকলশৰীয়া মাতৃ । উত্তৰাখণ্ডত জলপ্ৰলয় হোৱাৰ সময়তে সন্ধানহীন হৈছিল কমল দাস আৰু অমৰজ্যোতি দাস । একেখন ঘৰৰে দুই ভাতৃ নিৰুদ্দেশ হোৱাৰ ঘটনা দেওবাৰে পোহৰলৈ অহাৰ পিছতেই হাহাকাৰ পৰিস্থিতিৰ সৃষ্টি হয় ৷ বৰ্তমানলৈকে সন্ধান ওলোৱা নাই ভাতৃদ্বয়ৰ ।
কোনো খবৰ লাভ নকৰাত শংকিত হৈ পৰিছে পৰিয়ালৰ সদস্যসকল । জানিব পৰা মতে, উত্তৰাখণ্ডত কৰ্মৰত হৈ আছিল কামপুৰৰ উত্তৰ চাংচকীৰ দুই ভাতৃ ১৯ বছৰীয়া অমৰজ্যোতি দাস আৰু ২৯ বছৰীয়া কমল দাস । ৪ বছৰ পূৰ্বে কামপুৰৰ উত্তৰ চাংচকীৰ কমল দাসে এটা ব্যক্তিগত প্ৰতিষ্ঠানত সুৰক্ষা কৰ্মী হিচাপে কাম কৰিবলৈ উত্তৰাখণ্ডলৈ গৈছিল । পৰৱৰ্তী সময়ত কমল দাসৰ ভাতৃ অমৰজ্যোতি দাস লক ডাউনৰ পূৰ্বে উত্তৰাখণ্ডলৈ গৈছিল । তেতিয়াৰে পৰা তেওঁলোক ঘৰলৈ ঘূৰি অহা নাছিল ।
উত্তৰাখণ্ডত সন্ধানহীন কামপুৰৰ ২ জন যুৱক সন্ধানহীন হৈ থকা কমল দাস এটি পাঁচমহীয়া সন্তানৰ পিতৃ । দেওবাৰে পুৱা তেওঁলোক কৰ্মৰত হৈ থকা প্ৰতিষ্ঠানটোৰ কৰ্তৃপক্ষই পৰিয়ালৰ লোকক ফোন যোগে যুৱক দুজন সন্ধানহীন হোৱা বুলি জনাইছিল । পৰিয়ালৰ লোকৰ মাজত হাহাকাৰ পৰিস্থিতিৰ সৃষ্টি হয় । দুয়ো পুত্ৰ সন্ধানহীন হোৱাৰ খবৰ পোৱাৰ পিছতে পিতৃহীন যুৱকদ্বয়ৰ মাতৃ সংজ্ঞাহীন হৈ পৰে । উল্লেখযোগ্য যে, উত্তৰাখণ্ডত হোৱা জল প্ৰলয়ে ভয়াৱহ বিপদ মাতি আনিছে বহুতৰে জীৱনলৈ । উত্তৰাখণ্ডৰ স্থানীয় সূত্ৰৰ পৰা জানিব পৰা মতে, ১৫০ জনৰো অধিক লোকক জীৱন্তে উটুৱাই নিছে কোবাল সোঁতে ৷ হিমস্খলনৰ ফলত চাম'লী জিলাত ভয়ংকৰ পৰিৱেশৰ সৃষ্টি হৈছে ৷ অসমৰ যুৱকদ্বয়কো পানীয়ে উটুৱাই নিছে বুলি আশংকা কৰিছে স্থানীয় লোকে ।
আনহাতে, এই যুৱক দুজনৰ সৈতে হোজাই জিলাৰ কাকীৰ সুশান্ত নামৰ আন এজন যুৱক একেলগে আছিল । সেইগৰাকী যুৱকো বৰ্তমান সন্ধানহীন হৈ আছে বুলি জানিব পৰা গৈছে । সুশান্ত নামৰ যুৱকজন কমল দাসৰ খুলশালী বুলি পৰিয়ালৰ লোকে জানিবলৈ দিছে । প্ৰাপ্ত খবৰ অনুসৰি, কমল দাস আৰু অমৰজ্যোতি দাসে উত্তৰাখণ্ডত থকা ঘৰটোত দুৰ্ঘটনাৰ সময়ত ২১জন লোক আছিল । কোবাল সোঁতে তেওঁলোক থকা বাসগৃহতো উটুৱাই নিয়া বুলিও পৰিয়ালৰ লোকক যুৱক দুজনে কাম কৰা প্ৰতিষ্ঠানটোৰ কৰ্তৃপক্ষই জানিবলৈ দিছে । সন্ধানহীন যুৱক দুজনৰ পৰিয়ালৰ লোকে যুৱক দুজনক উদ্ধাৰ কৰি পৰিয়ালক গতাই দিবলৈ কেন্দ্ৰীয় আৰু ৰাজ্য চৰকাৰক আহ্বান জনাইছে ।
লগতে পঢ়ক: বিশ্বনাথ আৰক্ষীৰ অভিযানত আটক চোৰাং গৰুসহ ব্যৱসায়ী
