কলিয়াবৰ, 18 অক্টোবৰঃ কলিয়াবৰৰ পক্ষীতীৰ্থ জয়সাগৰ দলনীত দুষ্কৃতিকাৰীৰ বগলী নিধনৰ চেষ্টা ৷ আঘাটপ্ৰাপ্ত বগলীটোক উদ্ধাৰৰ ভিডিঅ’ ছোছিয়েল মিডিয়াত ভাইৰেল কৰিছিল এজন প্ৰকৃতিপ্ৰেমীয়ে ৷ যি ভিডিঅ’ প্ৰচাৰ পিছতেই তৎপৰ হৈ পৰিছে বন বিভাগৰ লগতে বিভিন্ন প্ৰকৃতি প্ৰেমী ৷ পৰিৱেশ কৰ্মী তথা ফ্ৰেণ্ডশ্বীপ ফৰ এনিমেলচ্ৰ কৰ্মী দেৱশীষ কাকতিৰ এই ভিডিঅ’ ছ'চিয়েল মিডিয়াত ভাইৰেল হোৱাৰ পিছতেই কলিয়াবৰ আৰক্ষী আৰু বন বিভাগৰ সহযোগত উদ্ধাৰ কৰি চিকিৎসাৰ বাবে প্ৰেৰণ কৰা হয় বগলীটো ৷ মহকুমাধিপতি বিতুপন নেওগৰ উদ্যোগত মহকুমা প্ৰশাসনে এই কাৰ্যৰ বাবে সম্বৰ্ধনা জনায় দেৱাশীষক ৷
প্ৰকৃতিপ্ৰেমীৰ উৎকৃষ্ট নিদৰ্শন উল্লেখ্য যে, কলিয়াবৰৰ জয়সাগৰ দলনী বহু পৰিভ্ৰমী পক্ষীৰ ভ্ৰমণস্থলী ৷ শীতৰ আগমণৰ লগে-লগে প্ৰতি বছৰে হাজাৰ-হাজাৰ পৰিভ্ৰমী চৰায়ে ভিৰ কৰেহি ৷ প্ৰকৃতিপ্ৰেমী বেচৰকাৰী অনুষ্ঠান "ফ্ৰে'ণ্ডশ্বীপ ফৰ এনিমেলচ্"এ "ডব্লিউ ডব্লিউ এফ"ৰ সহযোগত জয়সাগৰ দলনীক প্ৰায় শতাধিক পক্ষীৰ বাসস্থান ৰূপে আৱিস্কাৰ কৰা হৈছে ৷ যাৰ বেছিভাগেই শীতকালৰ পৰিভ্ৰমী চৰাই ৷ বিভিন্ন দেশী-বিদেশী পক্ষীৰ কলৰৱত মুখৰিত জয়সাগৰ দলনী কলিয়াবৰৰ এক পৰ্যটন ক্ষেত্ৰ হোৱাৰ উপযুক্ত সমল হিচাপে গঢ় দিছে ৷ কিন্তু কিছুসংখ্যক দুষ্কৃতিকাৰীৰ পক্ষী নিধন আৰু ভূমি বেদখলৰ ফলত সম্প্ৰতি ভাৱুকি আহিছে এইসমূহ পৰিভ্ৰমী চৰাইলৈ ৷ এনেক্ষেত্ৰত ফ্ৰে'ণ্ডশ্বীপ ফৰ এনিমেলচ্ প্ৰতিষ্ঠানটো আৰু তাৰ সদস্য দেৱশীষ কাকতিৰ এই পদক্ষেপক আদৰণি জনাইছে সমূহ কলিয়াবৰবাসীয়ে ৷
