জুৰীয়া আৰক্ষীৰ তৎপৰতাত জব্দ চুৰি গাড়ী সহ হস্ত নিৰ্মিত পিষ্টল

জব্দকৃত ছুইফ্ট ডিজায়াৰ গাড়ী খন শনিবাৰে নগাঁও জিলাৰ জুৰীয়া চামধৰা গাৱঁৰ ইন্দ্ৰ বৰা নামৰ গাড়ী চালক এজনৰ ঘৰৰ পৰা চুৰি হৈছিল ৷

ৰূপহীহাট , 04 জুন :নগাঁও জিলাৰ জুৰীয়া আৰক্ষী থানাৰ ভাৰপ্ৰাপ্ত আৰক্ষী বিষয়া অৰ্পণ শ‌ইকীয়াৰ নেতৃত্বত আৰক্ষী দল এটায়ে চুৰি গাড়ীৰ লগতে এটা হস্তনিৰ্মিত পিষ্টল জব্দ কৰে ৷ জব্দকৃত AS-01-BV-7399 ছুইফ্ট ডিজায়াৰ গাড়ী খন , শনিবাৰে নগাঁও জিলাৰ জুৰীয়া চামধৰা গাৱঁৰ ইন্দ্ৰ বৰা নামৰ গাড়ী চালক এজনৰ ঘৰৰ পৰা চুৰি হৈছিল ৷

গাড়ীখন চুৰি হোৱাৰ পাচতে জুৰীয়া আৰক্ষীয়ে ক্ষীপ্ৰতাৰে অভিযান চলাই বঢ়মপুৰৰ দলৈ গাঁৱৰ পৰা গাড়ীখন উদ্ধাৰ কৰিবলৈ সক্ষম হয় ৷ লগতে চুৰিকাণ্ডৰ লগতে জড়িত থকা তিনিটা চোৰকো আৰক্ষীয়ে আটক কৰে ৷ ধৃত চোৰ কেইটা ক্ৰমে মতলাবুৰ ৰহমান , আজাদ আলী আৰু মানস শ‌ইকীয়া বুলি জানিব পৰা গৈছে ৷ আটকাধীন আজাদ আলী পূৰ্বতে বহুকেইটা চুৰি কাৰ্য সংঘটিত কৰি জেলৰ ভাত খাব লগীয়া হৈছিল বুলি আৰক্ষীয়ে জানিবলৈ দিয়ে ৷ আনহাতে ধৃত চোৰৰ দলটোৰ স্বীকাৰোক্তিৰ ভিত্তিত সোমবাৰে নিশা জুৰীয়া আৰক্ষীয়ে , জুৰীয়া মৰাণ গাৱঁৰ মতলাবুৰ ৰহমানৰ বাস গৃহৰ পৰা এটা হস্ত নিৰ্মিত পিষ্টল আৰু আমতলৰ পৰা AS-02-F-0121 নম্বৰৰ এখন ষ্টাৰ চিটি বাইক উদ্ধাৰ কৰে ৷