খোদ স্বাস্থ্যমন্ত্ৰীৰ গৃহ সমষ্টিতে ক’ভিড টীকাকৰণৰ নামত বেমেজালি

খোদ ৰাজ্যৰ স্বাস্থ্যমন্ত্ৰী কেশৱ মহন্তৰ গৃহ সমষ্টি কলিয়াবৰতে সংঘটিত হৈছে ক’ভিড টীকাকৰণৰ নামত বেমেজালি ৷ টীকাকৰণ(covid vaccination)ৰ বাবে যোৱা লোকৰ পৰা মাচুল সংগ্ৰহ কৰাৰো অভিযোগ উত্থাপিত হৈছে এগৰাকী আশাকৰ্মীৰ বিৰুদ্ধে ৷

কলিয়াবৰ, 7 আগষ্ট : খোদ ৰাজ্যৰ স্বাস্থ্যমন্ত্ৰী কেশৱ মহন্ত(health minsister Keshav Mahanta)ৰ গৃহ সমষ্টিতে এইবাৰ সংঘটিত হৈছে ক'ভিড টীকাকৰণৰ বেমেজালি ৷ এগাৰাকী আশা(ASHA)কৰ্মীৰ বিৰুদ্ধে উত্থাপিত হৈছে বেমেজালি সংঘটিত কৰাৰ গুৰুতৰ অভিযোগ ৷ ক’ভিড টীকাকৰণ(covid vaccination)ৰ বাবে যোৱা লোকৰ পৰা মাচুল সংগ্ৰহ কৰাৰো অভিযোগ উত্থাপিত হৈছে বিতৰ্কিত আশাকৰ্মী গৰাকীৰ বিৰুদ্ধে ৷

বিভাগীয় কৰ্তৃপক্ষৰ লগতৰ আশা কৰ্মী গৰাকীৰ ভুলৰ বাবেই এতিয়া টীকাকৰণৰ পৰা বঞ্চিত হৈছে কলিয়াবৰৰ পাটলিআটীবাসী। পুৱাৰ পৰা ক'ভিড প্ৰতিষেধকৰ বাবে শাৰী পাতি বিমুখ মনৰে ঘৰলৈ ওভতি যাব লগীয়া হৈছে গাঁওবাসী । মন কৰিব লগীয়া যে, স্থানীয় আশাকৰ্মী গৰাকীয়ে গাঁওখনত থকা ১নং পাটলিআটী প্ৰাথমিক বিদ্যালয় প্ৰতিষেধক শিবিৰৰ খবৰ দিছিল ৰাইজক ।

অভিযোগ অনুসৰি, প্ৰতিষেধক প্ৰদানৰ নামত প্ৰত্যেকৰ পৰা ধনো সংগ্ৰহ কৰিছিল স্থানীয় আশাকৰ্মী গৰাকীয়ে ৷ কিন্তু পুৱাৰে পৰা দীঘলীয়া শাৰী পাতিও বিমুখ হ’ব লগীয়া হয় গাঁওবাসী ।

অৱশেষত, বহু পলমকৈ খবৰ আহিল যে ১ নং পাটলিআটী প্ৰাথমিক বিদ্যালয়খনৰ পৰিৱৰ্তে অন্য এখন বিদ্যালয়তহে ভেকচিন প্ৰদানৰ ব্যৱস্থা কৰা হৈছে । ফলত হাৰাশাস্তিৰ সন্মুখীন হৈ ক্ষোভিত হৈ পৰে ভেকচিন গ্ৰহণৰ পৰা বঞ্চিত লোকসকল । আনহাতে, মাছ-ভাতৰ বাবে আশা কৰ্মীগৰাকীয়ে ধন সংগ্ৰহৰ গুৰুতৰ অভিযোগ তোলে ভুক্তভোগী লোকসকলে । এই অভিযোগৰ পাছতে এক উত্তেজনাপূৰ্ণ পৰিৱেশ বিৰাজ কৰে বিদ‍্যালয়খনৰ প্ৰাঙ্গনত।

লগতে পঢ়ক :মন্ত্ৰীৰ ভাষ্য কিয় বাৰে বাৰে খণ্ডণ কৰিবলগীয়া হৈছে মুখ্যমন্ত্ৰীয়ে ?