নগাঁও, 10 ফেব্ৰুৱাৰী: প্ৰৱঞ্চক মৃদুপৱন নেওগ বিতৰ্কৰ মাজতে বদলি হ'ল নগাঁৱৰ আৰক্ষী অধীক্ষক আনন্দ মিশ্ৰ (Anand Mishra transferred)। নগাঁওবাসীক ধন্যবাদ জনাই বিদায় ল’লে আনন্দ মিশ্ৰই । ড্ৰাগছকে ধৰি বিভিন্ন অপৰাধৰ বিৰুদ্ধে ধাৰাবাহিক অভিযান চলাই নগাঁওবাসীৰ প্ৰশংসা বুটলিবলৈ সক্ষম হোৱা আনন্দ মিশ্ৰৰ বদলিত ক্ষুণ্ণ একাংশ সচেতন মহল । আনন্দ মিশ্ৰৰ বদলিৰ পিছতেই উত্থাপন হৈছে বহু প্ৰশ্নৰ ।
এটা এনকাউণ্টাৰক লৈ সৃষ্টি হোৱা বিতৰ্কৰ মাজতে হঠাৎ বদলি হ’ল নগাঁৱৰ আৰক্ষী অধীক্ষক আনন্দ মিশ্ৰ ৷ নগাঁওবাসীক ধন্যবাদ জনাই বিদায় ল’লে আৰক্ষী অধীক্ষক আনন্দ মিশ্ৰই ৷ চোৰ, ডকাইতকে ধৰি নগাঁৱৰ অপৰাধ জগতত মুক্ষম আঘাত হানিবলৈ সক্ষম হোৱা আৰক্ষী অধীক্ষক আনন্দ মিশ্ৰ সাঙোৰ খাই পৰিছিল নগাঁৱৰ প্ৰাক্তন ছাত্ৰনেতা কীৰ্তিকমল বৰা এনকাউণ্টাৰ বিতৰ্কত । বুধবাৰে এই এনকাউণ্টাৰৰ তদন্তৰ প্ৰতিবেদনক লৈ সংবাদমেলৰ আয়োজন কৰাৰ পিছতেই হঠাৎ জাৰি হ'ল আৰক্ষী অধীক্ষক আনন্দ মিশ্ৰৰ বদলিৰ নিৰ্দেশ । ইয়াৰ মাজতে উত্থাপিত হৈছে প্ৰৱঞ্চক মৃদুপৱনৰ প্ৰসংগ(Fraudster Mridupaban Neog Case) ৷
হাত দীঘল ব্যক্তি হিচাপে পৰিচিত গুৱাহাটীৰ প্ৰৱঞ্চক মৃদুপৱন নেওগক বিচাৰি অভিযান তীব্ৰতৰ কৰি তুলিছিল আৰক্ষী অধীক্ষক আনন্দ মিশ্ৰই । এগৰাকী দক্ষ আই পি এছ বিষয়া হিচাপে পৰিচিত আনন্দ মিশ্ৰকো একপ্ৰকাৰ চেলেঞ্জ কৰি সামাজিক মাধ্যমত বহুকেইটা চাঞ্চল্যকৰ মন্তব্য কৰিছিল প্ৰৱঞ্চনাৰ গোচৰত অভিযুক্ত মৃদুপৱন নেওগে । এনে অৱস্থাত হঠাৎ আৰক্ষী অধীক্ষক আনন্দ মিশ্ৰৰ বদলিত চৰ্চালৈ আহিছে বহু বাঘা বাঘা নেতাৰে ঘনিষ্ঠ বুলি চৰ্চিত প্ৰৱঞ্চক মৃদুপৱন নেওগৰ প্ৰসংগ ।