বটদ্ৰৱাত পথৰ দাঁতিত পেলাই যোৱা আঘাতপ্ৰাপ্ত লোকৰ মৃতদেহ উদ্ধাৰ

বটদ্ৰৱা (Batadrava)ত পথ দুৰ্ঘটনা (Road Accident)ত গুৰুতৰভাৱে আহত লোকক চিকিৎসালয়লৈ নিম বুলি কৈ পথৰ দাঁতিত পেলাই থৈ যোৱা ঘটনাই চাঞ্চল্যৰ সৃষ্টি কৰিছে ৷ এখন ছুইফটি ডিজাইয়াৰ বাহনে সংঘটিত কৰিছিল এই পথ দুৰ্ঘটনা ৷ বাহনখনৰ চালকে আহত লোকজনক চিকিৎসালয়লৈ নিয়াৰ দায়িত্ব বহন কৰি পলাই যায় ৷ এটি জিৰণি চৰাত উদ্ধাৰ হয় আঘাতপ্ৰাপ্ত লোকজনৰ মৃতদেহ ৷

চামগুৰি, 9 জুলাই : নগাঁও জিলাৰ বটদ্ৰৱা (Batadrava)ত বৃহস্পতিবাৰে সংঘটিত হৈছে এক চাঞ্চল্যকৰ ঘটনা ৷ পথ দুৰ্ঘটনা (Road Accident)ত এজন গুৰুতৰভাৱে আহত লোকক চিকিৎসালয়লৈ নিম বুলি কৈ পথৰ দাঁতিত পেলাই থৈ যোৱা ঘটনাই চাঞ্চল্যৰ সৃষ্টি কৰিছে ৷ ঘটনা অনুসৰি, জিলাখনৰ বটদ্ৰৱা আৰক্ষী থানাৰ অন্তৰ্গত নগাঁও-বটদ্ৰৱা সংযোগী গড়কাপ্তানি পথৰ ভেটিয়নীত সংঘটিত হৈছিল এক পথ দুৰ্ঘটনা ৷

উক্ত পথ দুৰ্ঘটনাত মুকছিদুল ইছলাম নামৰ লোকজন গুৰুতৰভাৱে আহত হয় । দুৰ্ঘটনা সংঘটিত কৰিছিল AS-01-DA-2033 নম্বৰৰ এখন ছুইফট ডিজাইয়াৰ বাহনে । ইয়াৰ পাচতে বাহনখনৰ চালকজনক আটক কৰে প্ৰত্যক্ষদৰ্শীয়ে ৷ কিন্তু চালকজনে মুকছিদুল ইছলামক চিকিৎসালয়লৈ নিয়াৰ দায়িত্ব বহন কৰি ঘটনাস্থলীৰ পৰা ওলাই গৈছিল ।

পৰৱৰ্তী সময়ত চালকজনে মুকছিদুল ইছলামক চিকিৎসালয়ত ভৰ্তি কৰোৱাৰ পৰিৱৰ্তে পলাই পত্ৰং দিয়া বুলি জানিব পৰা গৈছে ৷

ইফালে মুকছিদুলৰ পৰিয়ালে চালকজনক বিচাৰ-খোচাৰ কৰিও কোনো সন্ধান উলিয়াব নোৱাৰিলে ৷ অন্যহাতে, শুকুৰবাৰে পুৱতি নিশা নগাঁও-বটদ্ৰৱা সংযোগী পথৰ হাইডুবী জিৰণি চ’ৰাত মুকছিদুল ইছলামৰ মৃতদেহ উদ্ধাৰ হয় । লোকজনৰ মৃতদেহ উদ্ধাৰ হোৱা ঘটনাই এতিয়া চাঞ্চল্যৰ সৃষ্টি কৰিছে সমগ্ৰ বটদ্ৰৱা অঞ্চলত ।

লগতে পঢ়ক :ক’ভিড নিয়ন্ত্ৰণৰ বাবে কি নিৰ্দেশ দিলে ৰাজেন্দ্ৰ প্ৰসাদে