স্বাধীনতা কাপ ফুটবল: ফাইনেলত প্ৰৱেশ বি এছ এফ জলন্দৰ আৰু গকুলম এফ চি কেৰেলা

নগাওঁ ক্ৰীড়া সন্থাৰ উদ্যোগত নগাঁৱৰ নুৰুল আমিন ষ্টেডিয়ামত চলি থকা সৰ্বভাৰতীয় পৰ্যায়ৰ স্বাধীনতা কাপ ফুটবল প্ৰতিযোগিতাৰ ফাইনেলত প্ৰৱেশ পাঞ্জাৱৰ বি এছ এফ জলন্দৰ আৰু গকুলম কেৰেলা এফ চিৰ ।

নগাঁও, 22 অক্টোবৰ: স্বাধীনতা কাপ ফুটবল প্ৰতিযোগিতাৰ ফাইনেলত প্ৰৱেশ বি এছ এফ জলন্দৰ আৰু গকুলম কেৰেলা এফ চিৰ ৷ নগাঁও ক্ৰীড়া সন্থাৰ উদ্যোগত নগাঁৱৰ নুৰুল আমিন ষ্টেডিয়ামত অনুষ্ঠিত হয় সৰ্বভাৰতীয় পৰ্যায়ৰ স্বাধীনতা কাপ ফুটবল প্ৰতিযোগিতাখন ৷ মঙলবাৰে অনুষ্ঠিত হোৱা অন্তিমখন লীগ মেচত পাঞ্জাৱৰ বি এছ এফ দলে অইল ইণ্ডিয়া দুলিয়াজানক 1-0 গ'লত পৰাস্ত কৰে । লীগৰ তিনিখনকৈ খেলত পাঞ্জাৱৰ বি এছ এফে মুঠ 7 পইণ্ট অর্জন কৰি ফাইনেলত প্ৰৱেশ কৰাৰ বিপৰীতে অইল ইণ্ডিয়া দুলিয়াজানে তিনিখন খেলত শূণ্য পইণ্টতে সন্তুষ্ট থাকিবলগীয়া হয়।

ইপিনে অন্তিমখন লীগ মেচত কেৰেলাৰ গকুলম এফ চি আৰু অসম বিদ্যুৎ পৰিষদ গুৱাহাটীৰ মাজত 2-2 গ'লত অমীমাংসিত হয় যদিও তিনিখনকৈ খেলত কেৰেলাৰ গকুলমে 5 পইণ্ট অর্জন কৰি ফাইনেলত প্ৰৱেশ কৰিবলৈ সক্ষম হয় ৷ ইয়াৰ বিপৰীতে বিদ্যুৎ পৰিষদ অসমে তিনিখন মেচত লাভ কৰে চাৰি পইণ্ট। বুধবাৰে বিয়লি কেৰেলাৰ গকুলম এফ চি আৰু বি এছ এফ জলন্দৰ মাজত অনুষ্ঠিত হ’ব চূড়ান্ত খেলখন ।