কলিয়াবৰত চোৰাং কাঠ ভৰ্তি বাহন জব্দ, ব্যৱসায়ী আটক

কলিয়াবৰত চোৰাং কাঠ ব্যৱসায়ীৰ বিৰুদ্ধে বন বিভাগৰ অভিযান । জখলাবন্ধাৰ ঢেঁকীয়াল গাঁৱৰ পৰা জব্দ চোৰাং কাঠ ভৰ্তি বাহন । জমশেৰ নামৰ এজন কাঠ ব্যৱসায়ীক আটক ।

কলিয়াবৰ, ১১ মে': বন বিভাগে সময়ে সময়ে অভিযান চলাই অহাৰ পিছতো ৰাজ্যত একাংশ চোৰাং কাঠ ব্যৱসায়ীৰ বন ধ্বংসযজ্ঞ অব‍্যাহত আছে । মঙলবাৰে কলিয়াবৰত বন বিভাগৰ জালত পৰিল এজন চোৰাং কাঠ ব্যৱসায়ী । বন বিভাগে এখন কাঠ ভৰ্তি বাহন জব্দ কৰাৰ পিছতে ব্যৱসায়ীজনক আটক কৰে ।

কলিয়াবৰত চোৰাং কাঠ জব্দ

গোপন সূত্ৰৰ পৰা খবৰ লাভ কৰাৰ পিছতে শালনা বনাঞ্চলিক বিষয়া নেপাল মণ্ডলৰ নেতৃত্বত আন বন বিষয়া, বনকৰ্মীৰ এটা দলে জখলাবন্ধাৰ ঢেকীয়াল গাঁৱত অভিযান চলায় । এই অভিযানত বৃহৎ পৰিমাণৰ চোৰাং কাঠসহ এ. এচ. ০৪ ৩৭৪২ নম্বৰৰ এখন বাহন জব্দ কৰে অভিযানকাৰী দলটোৱে ।

অৱশ্যে, বাহনখনৰ চালক আৰু হেণ্ডিমেন পলায়ন কৰিবলৈ সক্ষম হয় । নগাঁও-কাৰ্বি আংলং সীমান্তৰ পৰা এই কাঠখিনি অবৈধভাৱে সৰবৰাহ কৰা হৈছে বুলি সন্দেহ প্ৰকাশ কৰিছে বন বিভাগে । আনহাতে, বাহনখন জব্দ কৰাৰ পিছতে বন বিভাগে জমশেৰ নামৰ এজন কাঠ ব্যৱসায়ীক আটক কৰে ।

জমশেৰে দীৰ্ঘ দিন ধৰি বন বিভাগৰ চকুত ধূলি দি চোৰাং কাঠৰ ৰমৰমীয়া ব্যৱসায় চলাই আহিছিল । অৱশেষত বন বিভাগৰ জালত পৰে ব্যৱসায়ীজন ।

লগতে পঢ়ক:কৰ'ণাত আক্ৰান্ত হৈ হায়দৰাবাদত জীৱন মৃত্যুৰে যুঁজিছে অসমৰ যুৱকে