বুদ্ধ পূৰ্ণিমাৰ বাবে বন্ধ থাকিল লাওখোৱা সহকাৰী স্বাস্থ্য কেন্দ্ৰ

চৰকাৰী চিকিৎসালয়ৰ আজৱ কাণ্ড ৷ বুদ্ধ পূৰ্ণিমাৰ বাবে বন্ধ থাকিল নগাঁৱৰ লাওখোৱাৰ এটা স্বাস্থ্য কেন্দ্ৰ ৷ চিকিৎসালয় কৰ্তৃপক্ষৰ বিৰুদ্ধে ব্যৱস্থা গ্ৰহণৰ দাবী উত্থাপন কৰিছে স্থানীয় ৰাইজে ৷

ৰূপহীহাট,27 মে’:চৌদিশে কৰ’ণা সংক্ৰমণৰ বাবে দিন-ৰাতি একাকাৰ কৰি কাম কৰিছে ৰাজ্যৰ স্বাস্থ্য খণ্ডত নিয়োজিত চিকিৎসক, নাৰ্চৰ লগতে অন্যান্য স্বাস্থ্য কৰ্মীসকলে ৷ নিজৰ জীৱনকো তুচ্ছ জ্ঞান কৰি কৰ্তব্য সম্পাদন কৰিছে স্বাস্থ্যখণ্ডৰ প্ৰতিগৰাকী যোদ্ধাই ৷ কিন্তু এইখন অসমতে ঘটিছে এক নাভূত-নাশ্ৰুত কাণ্ড ৷ বুধবাৰে বুদ্ধ পূৰ্ণিমা উপলক্ষে বন্ধ থকা দেখা গ’ল নগাঁৱৰ লাওখোৱা সহকাৰী স্বাস্থ্য কেন্দ্ৰটো ৷ বিদ্যালয় অথবা অন্যান্য চৰকাৰী কাৰ্যালয়ে বন্ধ পালন কৰাৰ দৰে বন্ধ পালিলে এইখন চৰকাৰী চিকিৎসালয়ে ৷

ৰাজ্যৰ স্বাস্থ্য বিভাগে 24 ঘণ্টাই কৰ’ণা পৰিস্থিতিৰ সৈতে মোকাবিলা কৰি থকাৰ বিপৰীতে এই স্বাস্থ্য কেন্দ্ৰত সংঘটিত এনে কাণ্ডই চকু কপালত তুলিছে ৰাইজৰ ৷ ঘটনাৰ বিৱৰণী অনুসৰি, বুধবাৰে স্বাস্থ্য কেন্দ্ৰটোত চিকিৎসা সেৱাৰ লগতে ঔষধ বিচাৰি গৈ বিমুখ হ’বলগীয়া হয় সাধাৰণ জনতা ৷ কিয়নো চিকিৎসালয়খনৰ সন্মুখত আঁৰি থোৱা হৈছিল এখন এনে ফলক, য’ত লিখা আছিল বুদ্ধ পূৰ্ণিমা উপলক্ষে স্বাস্থ্য কেন্দ্ৰটোৰ বহিঃ বিভাগ বন্ধ থকাৰ কথা ৷ চিকিৎসালয় কৰ্তৃপক্ষৰ এনে কাণ্ডত হতভম্ব হৈ পৰে ৰাইজ ৷

উল্লেখ্য যে, ক’ভিড-১৯ বাবে নগাঁৱতো তৎপৰ হৈ পৰিছে স্বাস্থ্য বিভাগ ৷ ইয়াৰ মাজতে চৰকাৰী চিকিৎসালয়ত ২৪ ঘণ্টাই ৰাইজক সেৱা প্ৰদান কৰিবলৈ চৰকাৰে দিয়া নিৰ্দেশ অনুযায়ী একাংশ চিকিৎসকে ৰোগীক চিকিৎসা সেৱা প্ৰদান কৰি আহিছে ৷ কিন্তু তেনে সময়তে লাওখোৱা সহকাৰী স্বাস্থ্য কেন্দ্ৰ কৰ্তৃপক্ষই কৰা এনে কাৰ্যত সৃষ্টি হৈছে ব্যাপক প্ৰতিক্ৰিয়া ৷ চিকিৎসালয় কৰ্তৃপক্ষৰ বিৰুদ্ধে ব্যৱস্থা গ্ৰহণৰ দাবী উত্থাপন কৰিছে স্থানীয় ৰাইজে ৷

লগতে পঢ়ক :এতিয়াৰ পৰা ২৪ ঘন্টাই খোলা থাকিব মুখ্যমন্ত্ৰীৰ সচিবালয়