নগাঁও, 30 এপ্ৰিল : ভাতৃস্নেহৰ অপূৰ্ব নিদৰ্শন ৷ দুই ভাতৃৰ স্নেহৰ বন্ধনে দৃষ্টি আকৰ্ষণ কৰিছে নগঞাৰ মন ৷ শয্যাগত অসহায় জ্যেষ্ঠ ভাতৃৰ সেৱাত ব্যস্ত কনিষ্ঠ ভাতৃ ৷ আমি ক’বলৈ লৈছো এটা ভগা পঁজাৰ কথা ৷ এই ভগা পঁজাটোৰ ভিতৰতে আছে এটি বান্ধোন । দুই ভাতৃৰ মৰম আৰু সহায়ৰ বান্ধোন । এই ভগা পঁজাটোৰ ভিতৰতেই আছে ভাতৃস্নেহৰ এখন হৃদয়স্পৰ্শী ছবি (Helpless youth from Nagaon appeal for help)।
আজিৰ স্বাৰ্থপৰ সমাজখনৰ বতাহে যেন চুব পৰা নাই এই ঘৰখনক । ঘৰখনৰ গৃহস্থ হ’ল দুই ভাতৃ ৰূপম আৰু আকাশদ্বীপ । কেইবছৰমান আগলৈকে ৰূপমে বেংকত চাকৰি কৰিছিল । কিন্তু কালৰ সোঁতত গুৱাহাটীৰ পৰা নগাঁৱৰ মৰিকলঙৰ ঘৰলৈ আহোত দুৰ্ঘটনাত পতিত হৈছিল ৰূপম । তাৰ পিচৰে পৰাই শয্যাগত হৈ পৰিল ৰূপম । তাৰ পৰাই আৰম্ভ হৈছে ভাতৃস্নেহৰ হৃদয়স্পৰ্শী কাহিনী ।
উল্লেখযোগ্য যে, 2021 চনৰে পৰাই শয্যাগত নগাঁৱৰ মৰিকলঙৰ ৰূপম বৰা । মাত্ৰ ডেৰমাহ পূৰ্বে মৃত্যু হৈছে পিতৃহাৰা ৰূপম আৰু আকাশদ্বীপৰ মাতৃৰ । মাতৃৰ বিয়োগৰ পিচৰ পৰাই জ্যেষ্ঠ ভাতৃৰ শুশ্ৰূষা কৰি আহিছে কণিষ্ঠ ভাতৃ আকাশদ্বীপ বৰাই । নগাঁও মহাবিদ্যালয়ত অধ্যয়নৰত আকাশদ্বীপে অতি কষ্টৰে পৰিচৰ্যা কৰি আহিছে ৰূপমৰ ।