নগাঁৱত ক’ভিড পৰিস্থিতিৰ বুজ ল’লে স্বাস্থ্যমন্ত্ৰী কেশৱ মহন্তই

শনিবাৰে বিধায়ক ৰূপক শৰ্মা আৰু বিধায়ক জিতু গোস্বামীৰ সৈতে নগাঁৱৰ ক’ভিড পৰিস্থিতিৰ বুজ লয় স্বাস্থ্যমন্ত্ৰী কেশৱ মহন্তই ৷

নগাঁও, 15 মে’: শনিবাৰে নগাঁৱত উপস্থিত হৈ জিলাখনৰ ক’ভিড পৰিস্থিতিৰ বুজ লয় স্বাস্থ্যমন্ত্ৰী কেশৱ মহন্তই ৷ নগাঁৱৰ ভোগেশ্বৰী ফুকননী অসামৰিক চিকিৎসালয়ত ক’ভিড ৰোগীসকলৰ চিকিৎসাৰ ক্ষেত্ৰত গাফিলতিৰ অভিযোগ উত্থাপন হোৱাৰ পিছতেই শনিবাৰে চিকিৎসালয়খনৰ চিকিৎসা ব্যৱস্থাৰ বুজ লয় স্বাস্থ্যমন্ত্ৰী গৰাকীয়ে ৷

ইয়াৰ পিছতেই নগাঁও জিলা প্ৰশাসনৰ সৈতে আলোচনাত মিলিত হয় স্বাস্থ্যমন্ত্ৰী গৰাকী ৷ 20 খন আই চি ইউ বিচানাযুক্ত চিকিৎসালয়খনত আগন্তুক দহ দিনৰ ভিতৰত অতিৰিক্ত 40 খন বিচনাৰ কাম সম্পূৰ্ণ হ’ব বুলি সংবাদ মাধ্যমৰ আগত মন্তব্য কৰে মন্ত্ৰী কেশৱ মহন্তই ৷

ইয়াৰ উপৰিও ক’ভিড কেয়াৰ কেন্দ্ৰত থকা ৰোগীসকলক এতিয়াৰে পৰা প্ৰতিদিনে 300 টাকাৰ খাদ্য যোগান ধৰাৰ লগতে ৰাজ্যত অতিশীঘ্ৰে 100 খন 108 এম্বুলেঞ্চৰ ব্যৱস্থা কৰা হ’ব বুলি ঘোষণা কৰে স্বাস্থ্যমন্ত্ৰী গৰাকীয়ে ৷ আনহাতে, আগন্তুক 17 মে’ৰ পৰা ৰাজ্যত দৈনিক 1 লাখ ক’ভিড পৰীক্ষা কৰাৰ লগতে ৰাজহুৱা স্থানসমূহ চেনিটাইজ কৰাৰ ব্যৱস্থা কৰিবলৈও জনস্বাস্থ্য কাৰিকৰী বিভাগক নিৰ্দেশ দিয়ে স্বাস্থ্যমন্ত্ৰী গৰাকীয়ে ৷

শনিবাৰৰ এই ভ্ৰমণকালত স্বাস্থ্যমন্ত্ৰী গৰাকীক সংগ দিয়ে নগাঁৱৰ বিধায়ৰ ৰূপক শৰ্মাৰ লগতে বঢ়মপুৰৰ বিধায়ক জিতু গোস্বামীয়ে ৷

লগতে পঢ়ক-ডিফুত দিন-দুপৰতে ব্যৱসায়ীক গুলীয়াই হত্যা