তীৰৰ বিৰুদ্ধে কঠোৰ নগাঁও আৰক্ষী নগাঁও, 21 জুন: অবৈধ তীৰৰ বিৰুদ্ধে কঠোৰ নগাঁও আৰক্ষী ৷ অৱশেষত আৰক্ষী অধীক্ষক নৱনীত মহন্তৰ জালত পৰিল নগাঁৱৰ কুখ্যাত তীৰ মাফিয়া বাবুল আলী ৷ লীনা দলেৰ চকুত নপৰা বাবুল আলী পলাতক হৈ আছিল লীনা দলেৰ বদলিৰ পাচৰ পৰাই ৷
বিগত সময়ত নগাঁৱত দপদপাই ফুৰা কুখ্যাত তীৰ মাফিয়া বাবুল আলী অৱশেষত জালত পৰিল নগাঁও আৰক্ষীৰ ৷ নগাঁৱৰ আৰক্ষী অধীক্ষক হিচাবে যোগদান কৰাৰ পাছৰ পৰাই অপৰাধীৰ বিৰুদ্ধে কঠোৰ স্থিতি গ্ৰহণ কৰা নৱনীত মহন্তৰ নেতৃত্বত নগাঁও আৰক্ষী তৎপৰ হৈছে ড্ৰাগছৰ সমান্তৰালকৈ তীৰৰ বিৰুদ্ধে ৷ নগাঁৱৰ পূৰ্বৰ আৰক্ষী অধীক্ষক লীনা দলেৰ বদলিৰ পাছৰ পৰাই পলাতক হৈ থকা কুখ্যাত তীৰ মাফিয়া বাবুল আলীক বিচাৰি অভিযান অব্যাহত ৰাখিছিল নগাঁও আৰক্ষীয়ে ৷ অৱশেষত মঙলবাৰে নিশা আৰক্ষী অধীক্ষক নৱনীত মহন্তৰ নিৰ্দেশত নগাঁও আৰক্ষীৰ এটা দলে অভিযান চলাই জালত পেলাবলৈ সক্ষম হয় কুখ্যাত তীৰ মাফিয়া বাবুল আলীক ৷
অভিযোগ অনুসৰি বিগত সময়ছোৱাত একাংশ আৰক্ষীৰেই কুখ্যাত তীৰ মাফিয়া বাবুল আলীৰ আছিল সু-সম্পৰ্ক ৷ কেৱল আৰক্ষীৰ সৈতেই নহয় বহু মুখা পিন্ধা ব্যক্তিৰ সৈতেও কুখ্যাত তীৰ মাফিয়া বাবুল আলীৰ আছিল সু- সম্পৰ্ক ৷ লীনা দলে বদলি হোৱাৰ পিছৰ পৰাই বাবুল আলীৰ বিৰুদ্ধে সামাজিক মাধ্যমত উত্থাপন হৈ আহিছে বিভিন্ন অভিযোগ ৷ একাংশ ব্যক্তিৰে তীৰ মাফিয়া বাবুল আলীৰ সু-সম্পৰ্কৰ বিষয়েও ব্যাপক চৰ্চা লাভ কৰিছিল সামাজিক মাধ্যমত ৷
বৰ্তমান নগাঁও আৰক্ষীৰ জিম্মাত থকা তীৰ মাফিয়া বাবুল আলীক জেৰা কৰিলে বাবুল আলীৰ সৈতে জড়িত থকা বহু ৰৌ-বৰালীৰ নাম পোহৰলৈ অহাৰ সম্ভাৱনা আছে বুলিও চৰ্চিত হৈছে বিভিন্ন মাধ্যমত ৷ মঙলবাৰে নিশা নগাঁও আৰক্ষীয়ে চলোৱা এক অভিযানত বাবুল আলীৰ লগতে আৰক্ষীয়ে আটক কৰে কৃষ্ণ দেৱনাথ নামৰ আন এটা তীৰৰ বুকীকো ৷
লগতে পঢ়ক:Jonali Nath murder case update: 5 দিনৰ আৰক্ষীৰ জিম্মাত জোনালী নাথ হত্যাকাণ্ডৰ অভিযুক্ত আজিবৰ ৰহমান
