মৈৰাবাৰীত 4 জুৱাৰীসহ এজন তীৰ বুকি আটক

শুকুৰবাৰে মৈৰাবাৰীত 4 জন জুৱাৰীৰ লগতে এজন তীৰ বুকি আটক ৷ জুৱা খেলি থকাৰ অৱস্থাত জুৱাৰী কেইজনক আটক কৰে আৰক্ষীয়ে ৷ জুৱাৰী কেইজনৰ পৰা বহু জুৱা সামগ্ৰীৰ আৰু পাঁচ হাজাৰ টকা জব্দ ৷

ধিং,4 জুন : ধিঙৰ মৈৰাবাৰীত আৰক্ষীৰ তালাচী অভিযানত শুকুৰবাৰে আটক হয় 4 জন জুৱাৰীৰ লগতে এজন তীৰ বুকি ৷ মৈৰাবাৰী আৰক্ষী থানাৰ নৱ নিযুক্ত আৰক্ষী বিষয়া মৃদুল হাজৰিকাৰ নেতৃত্বত এটি আৰক্ষীৰ দলে অভিযান চলাই বৰথল দলৈগাঁৱৰ পৰা চাৰি জুৱাৰীক আটক কৰাৰ লগতে ৰে’ল ষ্টেচনৰ পৰা আটক কৰে তীৰ বুকিজনক ৷

দলৈগাঁও অঞ্চলটোত জুৱা খেলৰ ঘাটি স্থাপন কৰা জুৱাৰী কেইজনক আটক কৰাত সন্তুষ্টি প্ৰকাশ কৰিছে স্থানীয় ৰাইজে ৷ আটকাধীন জুৱাৰী কেইজন ক্ৰমে- বাবুল ইছলাম, মকিবুল ইছলাম, আবুল কালাম আৰু শ্বহিদুল ইছলাম ।

জুৱা খেলি থকাৰ অৱস্থাত আটক কৰা জুৱাৰী কেইজনৰ বিৰুদ্ধে মৈৰাবাৰী থানাত 231/2021 নম্বৰত গোচৰ ৰুজু কৰা হয় আৰু আৰক্ষীয়ে ধৃত জুৱাৰী কেইজনক মৰিগাঁও আদালতলৈ প্ৰেৰণ কৰে । উল্লেখ্য যে, জুৱাৰী কেইজনৰ পৰা বহু জুৱা সামগ্ৰীৰ লগতে পাঁচ হাজাৰ টকা জব্দ কৰিবলৈ সক্ষম হয় আৰক্ষীয়ে ৷

লগতে পঢ়ক :উত্তপ্ত হোজাই: হস্ত নিৰ্মিত বন্দুকসহ আটক এজন