নগাঁও, 10 অক্টোবৰ:অসম ক্ৰিকেট সন্থাৰ প্ৰাক্তন সম্পাদক, নগাঁও আনন্দৰাম ঢেকিয়াল ফুকন মহাবিদ্যালয়ৰ প্ৰাক্তন অধ্যক্ষ, বিশিষ্ট শিক্ষাবিদ, ক্ৰীড়া সংগঠক, সমাজকৰ্মী সহজানন্দ ওজাৰ 85 বছৰ বয়সত পৰলোকপ্ৰাপ্তি ঘটে ৷ সোমবাৰে নিশা 8.10 বজাত নিজা বাসগৃহত মৃত্যু ঘটে ওজাৰ । উল্লেখ্য যে, বিগত কিছুদিন ধৰি তেওঁ বাৰ্ধক্যজনিত ৰোগত আক্ৰান্ত হৈ আছিল ।
শিক্ষা আৰু ক্ৰীড়া ক্ষেত্ৰত অহোপুৰুষাৰ্থ কৰি অহা সহজানন্দ ওজাই নগাঁও ক্ৰীড়া সংস্থাৰ এসময়ৰ সম্পাদক আৰু সভাপতিৰ দায়িত্ব পালন কৰাৰ লগতে 1977 চনৰ পৰা 1986 চন পৰ্যন্ত অসম ক্ৰিকেট সংস্থাৰ সম্পাদকৰ দায়িত্ব বহন কৰিছিল । তেওঁৰ কাৰ্যকালতেই গুৱাহাটীৰ নেহৰু ষ্টেডিয়ামত পোনপ্ৰথমবাৰৰ বাবে ভাৰত আৰু ৱেষ্ট ইণ্ডিজৰ মাজত আন্তঃৰাষ্ট্ৰীয় পৰ্যায়ৰ ক্ৰিকেট খেল অনুষ্ঠিত হৈছিল । আনহাতে, অসম ক্ৰিকেট সংস্থাৰ সম্পাদকৰ দায়িত্বত থকাৰ সময়তে সহজানন্দ ওজা মেনেজাৰ হিচাপে ভাৰতীয় ক্রিকেট দলৰ লগত পাকিস্তান ভ্রমণলৈ যায় ।
এগৰাকী ক্ৰীড়া সংগঠক হিচাপে সহজানন্দ ওজাই নগাঁও তথা অসমৰ ক্ৰীড়া ক্ষেত্ৰৰ উত্তৰণত অহোপুৰুষাৰ্থ কৰিছিল । এগৰাকী নিৱন্ধকাৰ হিচাপে পৰিচিত সহজানন্দ ওজাই এসময়ত বাতৰি কাকতৰ ক্ৰীড়া সাংবাদিকতাৰ সৈতেও জড়িত আছিল । নগাঁৱৰ বিভিন্ন সামাজিক অনুষ্ঠানৰ লগত জড়িত সহজানন্দ ওজা মৃত্যু পৰ্যন্ত বেচৰকাৰী খণ্ডৰ শিক্ষা প্ৰতিষ্ঠান নগাঁও শিক্ষণ মহাবিদ্যালয় পৰিচালনা সমিতিৰ সভাপতি পদত অধিষ্ঠিত হৈ আছিল ।