পদপথত বাস কৰা লোকক খাদ্য বিতৰণ নগাঁৱৰ ছাত্ৰ সমাজৰ

নগাঁৱৰ কেইগৰাকীমান ছাত্ৰৰ প্ৰশংসনীয় পদক্ষেপ । নিজৰ গাঁঠিৰ ধন ভাঙি পদপথত বসবাস কৰা লোক সকলক বিতৰণ কৰে খাদ্য সামগ্ৰী ৷

চামগুৰি,29 মে’:ক’ভিড সৃষ্ট পৰিৱেশে জুৰুলা কৰিছে সাধাৰণ ৰাইজক ৷ আৰ্থিক দুৰৱস্থাৰ ফলত দিশহাৰা হৈ পৰিছে খাটিখোৱা ৰাইজ ৷ ক’ভিড মহামাৰীৰ ফলত বিশেষকৈ পদপথত থকা লোকসকলে অনাহাৰে-অনিদ্ৰাৰে দিন কটাব লগাত পৰিছে ৷

ক’ভিড-১৯ ৰ এই ভয়াৱহ পৰিস্থিতিৰ মাজতে শুকুৰবাৰে পদপথত বসবাস কৰা বহুলোকক সহায়ৰ বাবে আগবাঢ়ি আহিছে নগাঁৱৰ কেইগৰাকীমান ছাত্ৰ । উল্লেখ্য যে, নগাঁৱৰ ছাত্ৰ সমাজে ব্যক্তিগত প্ৰচেষ্টাত নিজৰ গাঁঠিৰ ধন ভাঙি নগাঁৱৰ পদপথত বসবাস লোকসকলক বিতৰণ কৰে খাদ্য সামগ্ৰী ৷

শুকুৰবাৰে পুৱাৰে পৰা নগাঁৱৰ ছাত্ৰ কেইজনে পদপথত বাস কৰা 60 জন লোকক ব্ৰেড, জাম, চুগাৰ ফ্ৰী বিস্কুটৰ লগতে এটাকৈ পানীৰ বটল বিতৰণ কৰে । বিগত কেইবামাহ ধৰি নগাঁৱত ছাত্ৰ কেইজনে ব্যক্তিগত প্ৰচেষ্টাৰে বিতৰণ কৰি আহিছে খাদ্য সমগ্ৰী ৷ নিজৰ সাধ্য অনুযায়ী খাদ্য সংকটত ভোগা লোকসকলক সহায়ৰ হাত আগবঢ়োৱা নগাঁৱৰ ছাত্ৰ কেইগৰাকীৰ প্ৰচেষ্টাক এতিয়া সকলোৱে প্ৰশংসা কৰিছে ৷

লগতে পঢ়ক:সৰুপথাৰত পথৰ দাঁতিত অসুস্থ অৱস্থাত কিশোৰী উদ্ধাৰ