বঢ়মপুৰ, 11জুলাইঃ এটা ভগ্ন মথাউৰিৰ বাবে চাৰিবাৰকৈ বানৰ কৱলত পৰিব লগা হৈছে ৰহা সমষ্টিৰ কচুৱা মাধৱপাৰা বাসী ৷ কুম্ভকৰ্ণ নিদ্ৰাত সাংসদ,বিধায়ক আৰু জলসম্পদ বিভাগ ৷ বৰপানী নৈয়ে মাধৱপাৰ চাপৰমুখ সংযোগী মাথাউৰিতো বিগত বছৰত ভাঙি নিছিল ৷ কিন্তু এটা বছৰ উকলি যোৱাৰ পাছতো কোনো গুৰুত্ব প্ৰদান নকৰিলে বিভাগীয় কৰ্তৃপক্ষৰ লগতে জনপ্ৰতিনিধি সকলে ৷
যাৰ ফলত কিছু পানী বাঢ়িলেই ভগ্ন মাথাউৰিৰে পানী সোমাই বহু কেইখন গাঁও জলমগ্ন কৰাৰ লগতে বৰো ধানৰ খেতি প্লাৱিত হয় ৷ এইবাৰ বছৰৰ চতুৰ্থটো বানত উক্ত মাথাউৰিতোৰ বৃহৎ অংশ ভাঙি পানী সোমাই চূৰমাৰ কৰি লৈ গ'ল কেইবাটাও বাসগৃহ ৷ চকুৰ আগতে আপোন ঘৰখন ভাঙি যোৱাত বয় বস্তু লৈ ওখ স্থানলৈ ৰাওনা হৈছে বানাক্ৰান্ত সকল ৷ ইফালে নগাঁও জিলাৰ উপাযুক্তৰ নিৰ্দেশত কামপুৰ ৰাজহ চক্ৰ বিষয়া ড৹ সংগীতা বৰঠাকুৰে জলসম্পদ আৰু গড়কাপ্তানী বিভাগৰ এটা দল লৈ উক্ত স্থানত উপস্থিত হয় যদিও দুয়োটা বিভাগৰ দ্বায়িত্ব নহয় বুলি গা-এৰা মন্তব্য কৰে ৷ এতিয়া প্ৰশ্ন হয়,যদি দুয়োটা বিভাগৰ অধিনত মাথাউৰিটো নপৰে তেন্তে কোন বিভাগে নিৰ্মাণ কৰিব এই মাথাউৰিটো ৷ যাৰ বাবে বিপাঙত পৰিছে দুৰ্ভগীয়া বানাক্ৰান্ত সকল ৷
লগতে পঢ়কঃ আৰক্ষীৰ জালত মহিলা প্ৰৱঞ্চক