নগাঁৱত কৃতী ছাত্ৰ-ছাত্ৰীক সম্বৰ্ধনা প্ৰফুল্ল কুমাৰ মহন্তৰ

নগাঁৱত কৃতী ছাত্ৰ ছাত্ৰীক সম্বৰ্ধনা প্ৰাক্তন মুখ্যমন্ত্ৰী প্ৰফুল্ল কুমাৰ মহন্তৰ। "জীৱনত সংঘাতে আগুৱাই যোৱাৰ ক্ষেত্ৰত সহায় কৰে": আৰক্ষী অধীক্ষক শংকৰব্ৰত ৰায় মেধি ৷

নগাঁও,2জুলাইঃ নগাঁৱৰ কৃতী ছাত্ৰ-ছাত্ৰীক সম্বৰ্ধনা জ্ঞাপন কৰে প্ৰাক্তন মুখ্যমন্ত্ৰী প্ৰফুল্ল কুমাৰ মহন্তই। মঙলবাৰে নগাঁৱৰ খগেন মহন্ত প্ৰেক্ষাগৃহত জয়শ্ৰী গোস্বামী মহন্তৰ সভাপতিত্ব অনুষ্ঠিত হোৱা এক গাম্ভীৰ্যপূৰ্ণ অনুষ্ঠানত উচ্চ আৰু উচ্চতৰ মাধ্যমিকত স্থান লাভ কৰা ছাত্ৰ-ছাত্ৰীৰ লগতে সুখ্যাতিৰে উত্তীৰ্ণ হোৱা ছাত্ৰ-ছাত্ৰীক সম্বৰ্ধনা জ্ঞাপন কৰে । উল্লেখ্য যে ছাত্ৰ-ছাত্ৰীক উৎসাহ দিয়াৰ উদ্দেশ্যে প্ৰতি বছৰেই প্ৰফুল্ল কুমাৰ মহন্তৰ একক প্ৰচেষ্টাত এই অনুষ্ঠানৰ আয়োজন কৰি আহিছে ।

এই অনুষ্ঠানতে নগাঁও জিলা আৰক্ষী অধীক্ষক শংকৰব্ৰত ৰায় মেধিয়ে ছাত্ৰ-ছাত্ৰীক উদ্দেশ্য কৰি বহু সংঘাতৰ মাজতো ভাৰতীয় প্ৰশাসনিক সেৱাত স্থান লাভ কৰা লোকৰ প্ৰসংগ উল্লেখ কৰি সংঘাতে জীৱনত আগুৱাই যোৱাৰ ক্ষেত্ৰত সহায় কৰে বুলি মন্তব্য কৰে। মঙলবাৰে অনুষ্ঠিত হোৱা অনুষ্ঠানত অগপৰ প্ৰাক্তন মন্ত্ৰী নুৰুল হুছেইন, গুনীন হাজৰিকা, বিশিষ্ট সাহিত্যিক উপেন্দ্ৰ বৰকটকী, জিলা উপায়ুক্ত যাদৱ শইকীয়া, নগাঁৱৰ বিভিন্ন মহাবিদ্যালয়, কণিষ্ঠ মহাবিদ্যালয়ৰ অধ্যক্ষসকলো উপস্থিত থাকে ৷