নগাঁও, 26 আগষ্ট:নগাঁৱৰ ধিং-বটদ্ৰৱা অঞ্চল পৰিণত হৈছে ড্ৰাগছৰ ঘাটিলৈ ৷ নিষিদ্ধ ড্ৰাগছ, পিষ্টল লগত ৰাখি অঞ্চলটোত নিজকে ডন হিচাপে প্ৰতিষ্ঠা কৰিব বিচৰা অভিযুক্ত ড্ৰাগছ মাফিয়া চিৰাজুল ইছলাম ৷ চিৰাজুলৰ ড্ৰাগছৰ ঘাটিৰ Exclusive দৃশ্য ইটিভি ভাৰতৰ হাতত ৷ ড্ৰাগছ সেৱনত ব্যস্ত লোকৰ দৃশ্য বন্দী হ'ল কেমেৰাত ৷ গ্ৰাহক আহিছে, কণ্টেইনাৰ খুলিছে আৰু সেৱন কৰিবলৈ আগবঢ়াই দিছে মাৰাত্মক ড্ৰাগছ ৷ এই সকলোবোৰ দৃশ্যই বন্দী হ'ল ইটিভি ভাৰতৰ কেমেৰাত ৷
দীৰ্ঘদিনৰ পৰা এনেদৰেই বৃহত্তৰ অঞ্চলটোত চলি আহিছে ড্ৰাগছৰ ঘাটি ৷ এই ক্ষেত্ৰত স্থানীয় আৰক্ষীৰ বিৰুদ্ধে উত্থাপন হৈছিল কোনো ধৰণৰ ব্যৱস্থা গ্ৰহণ নকৰাৰ অভিযোগ ৷ কেৱল অভিযোগেই নহয় মাত্ৰ কেইটামান দিন পূৰ্বে এই কাৰ্যৰ বিৰোধিতাৰে ৰাজপথলৈ ওলাই আহিছিল স্থানীয় লোক ৷ নিজৰ সন্তানৰ ভৱিষ্যতক লৈ শংকিত অভিভাৱক ওলাই আহি প্ৰতিবাদ সাব্যস্ত কৰি দাবী জনাইছিল ড্ৰাগছৰ ঘাটি উচ্ছেদৰ ৷ এয়া আছিল বিগত ১৭ এপ্ৰিলৰ কথা ৷ ড্ৰাগছ মাফিয়া চিৰাজুল ইছলামৰ বিৰুদ্ধে ওলাই অহা একাংশ লোকক পিষ্টলেৰে গুলীয়াই মৰাৰ ভাবুকি দিছিল ডনৰূপী ড্ৰাগছ মাফিয়া চিৰাজুলে ৷ অৱশেষত ৩০ এপ্ৰিলত নগাঁও আৰক্ষীয়ে এটা হস্ত নিৰ্মিত পিষ্টল, গুলীসহ ড্ৰাগছ মাফিয়া চিৰাজুলক গ্ৰেপ্তাৰ কৰি প্ৰেৰণ কৰিছিল জেল হাজোতলৈ ৷ মাত্ৰ কেইটামান দিন আলহীৰ দৰেই ৰঙা ঘৰত দিন কটাই পুনৰ মুকলি আকাশৰ তলত বিচৰণ কৰি নিজৰ বেপাৰ আৰম্ভ কৰিছিল চিৰাজুলে ৷