প্ৰসংগ বিজেপিৰ সভা: ৰহাৰ টোলগেটত তীব্ৰ বাক-বিতণ্ডা

বুধবাৰে অমিত শ্বাহৰ সভালৈ অধিগ্ৰহণ কৰা গাড়ীসমূহ নগাঁৱলৈ আহি থকাৰ সময়তে লাগে অথন্তৰ । অভিযোগ অনুসৰি, ৰহাৰ টোলগেট কৰ্তৃপক্ষই প্ৰতিখন গাড়ীৰ পৰা তিনিশ টকাকৈ কৰ বিচাৰে । কিন্তু টোলগেটত ধন দিবলৈ অমান্তি হয় বাহনসমূহৰ চালকসকলে ৷

ৰহা,25 ফেব্ৰুৱাৰীঃ নগাঁও জিলাৰ ৰহাৰ টোলগেটত বুধবাৰে দুপৰীয়া সৃষ্টি হয় এক উত্তেজনাময় পৰিস্থিতি । টোলগেট কৰ্তৃপক্ষ আৰু বাছ চালকৰ মাজত কৰ প্ৰদান কৰাক লৈ সৃষ্টি হয় সংঘাতৰ । উল্লেখযোগ্য যে, বৃহস্পতিবাৰে নগাঁৱলৈ আহিব দেশৰ গৃহমন্ত্ৰী অমিত শ্বাহ । অমিত শ্বাহৰ বৰদোৱাৰ সভালৈ মানুহ আনিবলৈ গুৱাহাটীৰ পৰা অধিগ্ৰহণ কৰা হৈছে বহু গাড়ী ।

সেই অনুসৰি বুধবাৰে অধিগ্ৰহণ কৰা গাড়ীসমূহ নগাঁৱলৈ আহি থকাৰ সময়তে ৰহাৰ টোলগেটত লাগে অথন্তৰ । টোলগেট কৰ্তৃপক্ষই প্ৰতিখন গাড়ীৰ পৰা তিনিশ টকাকৈ কৰ বিচাৰে । কিন্তু টোলগেটত ধন দিবলৈ অমান্তি হয় গুৱাহাটীৰ পৰা শ্বাহৰ সভালৈ অধিগ্ৰহণ কৰা বাহনসমূহৰ চালকসকলে ৷ যাৰ ফলস্বৰূপে তীব্ৰ বাক-বিতণ্ডাৰ সৃষ্টি হয় চালক আৰু টোলগেট কৰ্তৃপক্ষৰ মাজত ৷

আনহাতে, এই বাক-বিতণ্ডাৰ ফলত আধাঘণ্টা ধৰি টোলগেটত আৱদ্ধ হৈ পৰে বহু যান-বাহন । চৰকাৰী সভালৈ যোৱাৰ বাবে টোলগেটত কৰ দিবলৈ অমান্তি হয় বাছৰ চালকসকল ৷ অৱশ্যে পৰৱৰ্তী সময়ত টোলগেটৰ ঊৰ্ধতম কৰ্তৃপক্ষৰ লগত হোৱা আলোচনামৰ্মে বাছসমূহ পাৰ হৈ যায় ।

লগতে পঢ়কঃসোণৰ কণী পৰা হাঁহত পৰিণত অম্বিকাগিৰী পথ