নগাঁও, 8 ছেপ্টেম্বৰঃ বটদ্ৰৱাৰ বিধায়িকা আঙুৰলতা ডেকাই বাট-পথৰ আমোল পৰিৱৰ্তনৰ বিষয়ে কথাৰ ফুলজাৰি মাৰি থকাৰ সময়তে বটদ্ৰৱাৰ বিধ্বস্ত পথে উদঙালে গড়কাপ্তানি বিভাগৰ পঁয়ালগা স্বৰূপটো । বটদ্ৰৱাত জৰাজীৰ্ণ বাট-পথৰ গইনা লৈ এতিয়া বিদ্যালয়ৰ ছাত্ৰ ছাত্ৰীয়ে যাতায়তৰ ক্ষেত্ৰত দুৰ্ভোগ ভুগিব লগীয়া হৈছে ।
বটদ্ৰৱা ৰাইডঙীয়াৰ পৰা ডিমৌ সংযোগী পথ আৰু বটদ্ৰৱা ৰামপুৰ সত্ৰৰ পৰা বটদ্ৰৱা জামতলা সংযোগী পথটোৰ অৱস্থা সম্প্ৰতি বিধ্বস্ত । বছৰ-বছৰ ধৰি বটদ্ৰৱা সমষ্টিৰ এই বৃহত্তৰ অঞ্চলটোৰ ৰাইজে ৰাস্তা-ঘাটৰ দুৰৱস্থাৰ বাবে যিকোনো দিশত দুৰ্ভোগ ভোগ কৰি আহিব লগীয়া হৈছে । কিন্তু সকলো দেখিও বিধায়িকা আঙুৰলতা ডেকাই নিৰৱ ভূমিকাত থকাৰ অভিযোগ উত্থাপিত হৈছে । বিধায়িকা গৰাকীয়ে সমষ্টিৰ উন্নয়নৰ ক্ষেত্ৰত কাণষাৰ নিদিয়াৰ অভিযোগ উত্থাপন হৈছে । ভোটাৰৰ মন জয় কৰিবলৈ নিৰ্বাচনৰ সময়ত বিধায়িকা গৰাকীয়ে সমষ্টিটোত ন ন কৌশলো অৱলম্বন কৰিছিল । বহু কেইটা পথৰ বাবে তেওঁ আধাৰশিলাও স্থাপন কৰিছিল । কিন্তু নিৰ্বাচনৰ বৈতৰণী পাৰ হৈ যোৱাৰ পিচত এই পথ সমূহত আজিকোপতি এটাও শিলগুটি নপৰিল । এতিয়া প্ৰশ্ন হয় সততে উন্নয়নৰ কথা কোৱা বটদ্ৰৱা সমষ্টিৰ বিধায়িকা আঙুৰলতা ডেকাই নিৰ্বাচনৰ সময়ত য'তে ত'তে অভিলেখ গঢ়ি স্থাপন কৰা আধাৰশিলা, আধাৰশিলা হৈ ৰ'ব নে পথৰ ওপৰত শিলগুটিও পৰিব?