বঢ়মপুৰ, 27 জুলাই : কপিলী আৰু বৰপানী নৈৰ বান সামান্য পৰিমাণে হ্ৰাস পাইছে যদিও কামপুৰৰ বান পৰিস্থিতি আজিও অপৰিৱৰ্তিত অৱস্থাত আছে । দুৰ্যোগ আঁতৰা নাই বন্যাৰ্তসকলৰ মাজত ।
একেলেঠাৰিয়ে চাৰিবাৰকৈ অহা কপিলী আৰু বৰপানী নৈৰ বানে চৰম বিপৰ্যয় নমাই আনিছে ৰহা সমষ্টিৰ প্ৰায় 50 খনৰো অধিক গাঁৱলৈ ৷ নেলিপাৰ আৰু চিউগুৰিকে ধৰি বহু অঞ্চলত এতিয়াও ঘৰৰ মুধচলৈকে পানী । উপায়হীন হৈ একাংশ বানাক্ৰান্তই প্ৰায় এমাহ ধৰি মথাউৰিত আশ্ৰয় ল'বলৈ বাধ্য হৈছে ।
ইফালে চৰকাৰৰ পৰা বন্যাৰ্তসকলে খাদ্য সামগ্ৰী লাভ কৰিছে যদিও খোৱাপানীৰ অভাৱে তীব্ৰ সমস্যাত পেলাইছে বানাক্ৰান্তসকলক। দমকলসমূহ বানত বুৰ যোৱাত বানাক্ৰান্ত অঞ্চলত পাবলৈ নাই বিশুদ্ধ খোৱাপানী । সেয়েহে বানৰ লেতেৰা দুৰ্গন্ধময় পানী খাবলগীয়াত পৰিছে দুৰ্ভগীয়া বন্যাৰ্তসকলে ।
এই দুৰ্যোগৰ সময়ত জনস্বাস্থ্য কাৰিকৰী বিভাগে বানপীড়িত অঞ্চলত খোৱাপানীৰ ব্যৱস্থা নকৰাৰ অভিযোগ উত্থাপন কৰিছে বানাক্ৰান্ত ৰাইজে । লগতে, বানাক্ৰান্ত অঞ্চলত স্বাস্থ্য বিভাগৰ কোনো ব্যক্তি উপস্থিত হোৱা নাই বুলি ক্ষোভ প্ৰকাশ কৰে ।
লগতে পঢ়ক : উত্তৰ প্ৰদেশত একেটা পৰিয়ালৰ তিনিগৰাকীক গুলীয়াই হত্যা, এজন আহত