এজাহাৰকাৰীৰ পৰা হাঁহ-কুকুৰা বিচাৰি শাস্তিৰ সন্মুখীন আৰক্ষী বিষয়া

আইনৰ ৰক্ষকৰ বিৰুদ্ধেই দুৰ্নীতিৰ অভিযোগ। এজাহাৰকাৰীৰ পৰা হাঁহ-কুকুৰা বিচাৰি বিভাগীয় শাস্তিৰ সন্মুখীন আৰক্ষী বিষয়া। উৎকোচ বিচৰা আৰক্ষী বিষয়াক ৰিজাৰ্ভ ক্ল’জ।

নগাঁও, 14 ডিচেম্বৰ : অৰ্থলিপ্সু একাংশ আৰক্ষীৰ বাবেই যেন বদনামৰ নাম মচিবই নোৱাৰিব অসম আৰক্ষীয়ে ৷ অসম আৰক্ষীৰ দুৰ্নীতি নিবাৰক শাখাই দুৰ্নীতিৰ বিৰুদ্ধে ধাৰাবাহিকভাৱে অভিযান অব্যাহত ৰখাৰ পিছতো যেন শিক্ষা পোৱাই নাই একাংশ চৰকাৰী ঘোচখোৰ বিষয়া-কৰ্মচাৰীয়ে ৷

এইবাৰ ভুক্তভোগীৰ পৰাই উৎকোচৰ নামত হাঁহ-কুকুৰা বিচাৰি বিভাগৰ ৰোষত পৰিছে নগাঁৱৰ ৰূপহীহাটৰ এগৰাকী দুৰ্নীতিগ্ৰস্ত বিষয়া ৷ ৰূপহীহাটৰ গড়াজান আৰক্ষী পহৰা আৰক্ষী চকীৰ এগৰাকী খঁকুৱা সহকাৰী উপ-পৰিদৰ্শকৰ বিৰুদ্ধে এজাহাৰকাৰীৰ পৰাই হাঁহ-কুকুৰা বিচৰাৰ অভিযোগে জোকাৰিছে নগাঁও আৰক্ষীক ৷

উল্লেখ্য যে জিলাখনৰ বটদ্ৰৱা আৰক্ষীয়ে হাঁহ আৰু ধন লোৱাৰ অভিযোগত 2022 বৰ্ষৰ 21 মে’ত একাংশই থানা জ্বলাই দিয়াৰ ঘটনাই সমগ্ৰ দেশ কঁপাই গৈছিল ৷ যি ঘটনাৰ তদন্ত আজিও অব্যাহত থকাৰ মাজতেই নগাঁৱৰে গড়াজান আৰক্ষী পহৰা আৰক্ষী চকীৰ অম্বেশ্বৰ ৰাজখোৱা নামৰ সহকাৰী উপ-পৰিদৰ্শক জনে, আৰক্ষী চকীত বহি কৰ্তব্যৰত অৱস্থাত এজাহাৰকাৰীৰ পৰা ধন লোৱাৰ লগতে মদৰ বটল আৰু কুকুৰাৰ মাংস বিচৰা কাৰ্যই তীব্ৰ প্ৰতিক্ৰিয়াৰ সৃষ্টি কৰিছে নগাঁৱত ৷ যি ঘটনাই অসম আৰক্ষীৰ তথাকথিত দুৰ্নীতি মুক্ত আৰক্ষীৰ ফোপোঁলা স্বৰূপটোকেই যেন উদঙাই দিছে ৷

দুৰ্নীতিপৰায়ণ খঁকুৱা আৰক্ষী বিষয়া অম্বেশ্বৰ ৰাজখোৱাই গোচৰ আদালতলৈ প্ৰেৰণ কৰাৰ নামত এহাজাৰৰ লগতে লৈছিল টকা ৷ এজাহাৰৰ লগতে টকা লোৱাৰ সমগ্ৰ দৃশ্য আবদ্ধ হৈছিল গোপন কেমেৰাত ৷ পূৱ ফুটলজাৰৰ জনৈক ছাত্তাৰ নামৰ লোকজনে নিজৰ কিশোৰী কন্যা অপহৰণ হোৱাৰ অভিযোগ উত্থাপন কৰি আৰিফুল হককে ধৰি মুঠ 6 জনৰ বিৰুদ্ধে গোচৰ ৰুজু কৰিছিল ৷

এই গোচৰটো আদালতত পঠোৱাৰ বাবেই কৰ্তব্যৰত অৱস্থাতেই খঁকুৱা আৰক্ষী বিষয়া অম্বেশ্বৰ ৰাজখোৱাই এজাহাৰকাৰীৰ পৰা এহাজাৰ টকা লোৱাৰ লগতে মদৰ বটল আৰু কুকুৰাৰ মাংস বিচাৰে ৷ বিভিন্ন মাধ্যমত ধন লোৱাৰ ভিডিঅ’ ভাইৰেল হোৱাৰ পিছতেই অভিযুক্ত আৰক্ষী বিষয়াগৰাকীৰ বিৰুদ্ধে ব্যৱস্থা গ্ৰহণৰ বাবে তৎপৰ হৈছে নগাঁও আৰক্ষী ৷ ইতিমধ্যে অভিযুক্ত বিষয়াগৰাকীৰ ৰিজাৰ্ভ ক্ল’জ কৰাৰ লগতে বিভাগীয় তদন্ত আৰম্ভ কৰিছে নগাঁও আৰক্ষীয়ে ৷

লগতে পঢ়ক :ভূ-মাফিয়াৰ অত্যাচাৰত মৃত্যু হোৱা নিৰঞ্জনে পাবনে ন্যায় ?