পেডেল মাৰি মাৰি মূল্যবৃদ্ধিৰ বিৰুদ্ধে প্ৰতিবাদ ৰকিবুল, প্ৰদ্যুতৰ

পেট্ৰল-ডিজেলৰ পৰা অত্যাৱশ্যকীয় সামগ্ৰীৰ মূল্যবৃদ্ধি নিয়ন্ত্ৰণৰ দাবীত উত্তাল প্ৰতিবাদ সাব্যস্ত কৰে নগাঁও জিলা কংগ্ৰেছে ৷ প্ৰতিবাদত অংশগ্ৰহণ কৰি বিজেপি চৰকাৰক জনবিৰোধী চৰকাৰ আখ্যা দিয়ে সাংসদ প্ৰদ্যুৎ বৰদলৈয়ে ।

নগাঁও, 10 জুলাই : "ক'ভিডসৃষ্ট পৰিৱেশে জুৰুলা কৰা সাধাৰণ জনতাৰ ওপৰত এতিয়া মূল্যবৃদ্ধিয়ে মাধমাৰ শোধাইছে । মূল্যবৃদ্ধি ৰোধ কৰিব নোৱাৰা চৰকাৰখনে এতিয়া সামৰিক বাহিনী লগাই সাধাৰণ জনতাক গুলীয়াবলৈ লগাই দিছে ৷ বিদ্যুৎ মাচুল ৰেহাই দিয়াৰ বিপৰীতে বিজেপি চৰকাৰে ব্ৰিটিছৰ দৰে পাইকাৰী জৰিমনা বিহাৰ ফলত বিদ্যুতৰ মাচুল তিনিগুন, চাৰিগুন বৃদ্ধি হৈছে ৷" শনিবাৰে নগাঁৱত মূল্যবৃদ্ধিৰ বিৰুদ্ধে প্ৰতিবাদ সাব্যস্ত কৰি এইদৰে প্ৰতিক্ৰিয়া প্ৰকাশ কৰিলে বিৰোধী উপ-দলপতি ৰকিবুল হুছেইনে ৷

নগাঁও চহৰৰ ৰাজপথত পেডেল মাৰি মাৰি মূল্য বৃদ্ধি নিয়ন্ত্ৰণৰ দাবীত প্ৰতিবাদ সাব্যস্ত কৰে বিৰোধী দলৰ উপ-দলপতি ৰকিবুল হুছেইনৰ লগতে নগাঁও লোকসভা সমষ্টিৰ সাংসদ তথা জ্যেষ্ঠ কংগ্ৰেছ নেতা প্ৰদ্যুৎ বৰদলৈয়ে ৷ পেট্ৰ'ল-ডিজেলকে ধৰি অন্যান্য অত্যাৱশ্যকীয় সমগ্ৰীৰ মূল্যবৃদ্ধিৰ নিয়ন্ত্ৰণৰ দাবীত নগাঁও জিলা কংগ্ৰেছে নগাঁও ৰাজীৱ ভৱনৰ পৰা এক চাইকেল সমদল উলিয়াই ৷

ক'ভিড প্ৰট'কল ৰক্ষা কৰি নগাঁও চহৰত কংগ্ৰেছে মূল্যবৃদ্ধিৰ বিৰুদ্ধে প্ৰতিবাদ সাব্যস্ত কৰাৰ লগতে আৰম্ভ কৰে গণস্বাক্ষৰ অভিযান । মূল্যবৃদ্ধি ৰোধ কৰাৰ দাবীত জনসাধাৰণে স্বতঃস্ফূৰ্তভাৱে স্বাক্ষৰ কৰা পৰিলক্ষিত হয় । কংগ্ৰেছৰ এই প্ৰতিবাদী কাৰ্যসূচীত অংশগ্ৰহণ কৰি বিজেপি চৰকাৰক চোকা সমালোচনা কৰে প্ৰাক্তন মন্ত্ৰী ৰকিবুল হুছেইনৰ লগতে সাংসদ প্ৰদ্যুৎ বৰদলৈয়ে ।

নগাঁও লোকসভা সমষ্টিৰ সাংসদ তথা কংগ্ৰেছৰ জ্যেষ্ঠ নেতা প্ৰদ্যুৎ বৰদলৈয়েও আক্ৰমণৰ লক্ষ্য কৰি লয় কেন্দ্ৰৰ নৰেন্দ্ৰ মোদী চৰকাৰ আৰু ৰাজ্যৰ হিমন্ত বিশ্ব শৰ্মা নেতৃত্বাধীন বিজেপি চৰকাৰক । বিজেপি চৰকাৰৰ শাসনকালত আম্বানী-আদানীৰ দৰে পুঁজিপতিসকল অধিক ধনী হোৱাৰ বিপৰীতে মধ্যবিত্ত আৰু দৰিদ্ৰ শ্ৰেণীৰ লোকৰ জীৱন দিনক দিনে পানীত হাঁহ নচৰা অৱস্থাৰ সৃষ্টি হৈছে বুলি কয় প্ৰদ্যুৎ বৰদলৈয়ে ।

দৰিদ্ৰ আৰু মধ্যবিত্ত শ্ৰেণীৰ লোকৰ বিৰুদ্ধে বিজেপি চৰকাৰখনে অহৰহ ষড়যন্ত্ৰ কৰি থকা বুলি অভিযোগ উত্থাপন কৰি বিজেপি চৰকাৰক জনবিৰোধী চৰকাৰ আখ্যা দিয়ে সাংসদ প্ৰদ্যুৎ বৰদলৈয়ে । চাইকেল সমদলেৰে সাব্যস্ত কৰা প্ৰতিবাদী কাৰ্যসূচীত শাসক বিৰোধী শ্ল'গানেৰে প্ৰতিবাদস্থলী উত্তাল কৰি তোলে কংগ্ৰেছ কৰ্মীসকলে ।

গণ স্বাক্ষৰ সংগ্ৰহ কৰি নগাঁও জিলা কংগ্ৰেছৰ উদ্যোগত মূল্যবৃদ্ধি ৰোধ কৰাৰ দাবীত নগাঁও জিলা উপায়ুক্তৰ জৰিয়তে দেশৰ প্ৰধানমন্ত্ৰী আৰু ৰাজ্যৰ মুখ্যমন্ত্ৰীলৈ এখনি স্মাৰক পত্ৰ প্ৰেৰণ কৰা হয় ৷

লগতে পঢ়ক: মৰিগাঁও ধৰ্ষণ আৰু হত্যাৰ গোচৰ: পাঠাক লৈ চৰজমিন তদন্ত আৰক্ষীৰ