কলিয়াবৰ, 17 জানুৱাৰী : ‘‘মণিপুৰৰ পৰা আৰম্ভ হোৱা ভাৰত জোড়ো ন্যায় যাত্ৰাই মোদী চৰকাৰৰ 10 বছৰীয়া 'অন্যায় কাল'ৰ বিৰুদ্ধে উলিওৱা যাত্ৰা ৷’’ মঙলবাৰে কলিয়াবৰত উপস্থিত হৈ এই মন্তব্য কৰিলে সাংসদ গৌৰৱ গগৈয়ে ৷ বৰ্তমান চৰকাৰখনে দেশবাসীৰ প্ৰতি যি অন্যায়, অত্যাচাৰেৰে কুশাসন চলাইছে তাৰ বিৰুদ্ধে দেশবাসীক সচেতন কৰাৰ লক্ষ্যৰে ভাৰত ন্যায় যাত্ৰা কৰা হৈছে বুলি সাংসদ গগৈয়ে কয় ।
দেশত বলিছে নিৰ্বাচনী বতাহ। সক্ৰিয় হৈ পৰিছে দেশৰ ৰাজনৈতিক দলসমূহ । ভাৰত জোড়ো ন্যায় যাত্ৰাৰ জৰিয়তে কংগ্ৰেছেও মণিপুৰৰ পৰা আৰম্ভ কৰিছে এক প্ৰকাৰ নিৰ্বাচন কেন্দ্ৰীক অভিযান । ইফালে ভাৰত জোড়ো ন্যায় যাত্ৰাই 21 জানুৱাৰীত অসমৰ গহপুৰত কনকলতাৰ প্ৰতিমূৰ্তিত শ্ৰদ্ধাঞ্জলি জনাই বিশ্বনাথ চাৰিআলিলৈ যাত্ৰা কৰিব । বিশ্বনাথত পদযাত্ৰা কৰি জামুগুৰিহাটৰ পৰা কলিয়াবৰলৈ যাত্ৰা কৰি কলিয়াবৰত এখন জনসভাত ভাগ ল’ব ৰাহুল গান্ধীয়ে ৷ সেইয়ে দলীয়া কৰ্মীৰ সৈতে প্ৰস্তুতি সম্পৰ্কে বুজ ল’বলৈ মঙলবাৰে কলিয়াবৰত উপস্থিত হয় সাংসদ গৰাকী ৷
মোদী চৰকাৰক সমালোচনা কৰি সাংসদ গগৈয়ে কয়, ‘‘মণিপুৰ জ্বলি থকাৰ সময়ত প্ৰধানমন্ত্ৰীয়ে এবাৰো ৰাজ্যখনলৈ যাবলৈ ইচ্ছা প্ৰকাশ নকৰিলে। বিপৰীতে ৰাহুল গান্ধীয়ে দ্বিতীয়বাৰৰ বাবে মণিপুৰত উপস্থিত হৈ ৰাজ্যবাসীৰ কাষত উপস্থিত হৈছে ৷’’ তেওঁ পুনৰ ভাৰত জোড়ো ন্যায় যাত্ৰাৰ কথা উল্লেখ কৰি কয় যে, এই যাত্ৰা নিৰ্বাচনী যাত্ৰা নহয়, এক আদৰ্শগত যাত্ৰা আৰু এই যাত্ৰা মোদী চৰকাৰৰ অন্যায় বিৰুদ্ধে উলিওৱা যাত্ৰা ।