নগাঁও , 27 আগষ্টঃ উৎকট গৰমে দহিছে ৰাজ্যবাসীক৷ ইয়াৰ সমান্তৰালভাৱে বৃদ্ধি পাইছে শীতল পানীয়ৰ চাহিদা ৷ গৰমৰ পৰা পৰিত্ৰাণ পাবলৈ কোনোৱে যদি শীত তাপ নিয়ন্ত্ৰিত কক্ষৰ সহায় লৈছে কোনোৱে আকৌ শীতল পানীয় পান কৰি চেষ্টা অব্যাহত ৰাখিছে গৰমৰ পৰা ৰক্ষা পোৱাৰ ৷ বজাৰত উভৈনদী হৈ পৰিছে ৰং বিৰঙৰ শীতল পানীয়। কিন্তু বিভিন্ন শীতল পানীয়ৰ বিপৰীতে ৰাইজক সম্পূৰ্ণ প্ৰাকৃতিকভাৱে প্ৰস্তুত শীতল পানীয় যোগান ধৰি আহিছে এখন বজাৰে৷
নগাঁও আৰু মৰিগাঁও জিলাৰ সীমান্তৰ ঠেকেৰাগুৰিৰ এখন ডাবৰ বজাৰ৷ উৎকট গৰমত এই পথেৰে আহ যাহ কৰা বহুতেই নিজৰ বাহনখন ৰখাই এই স্থানত পান কৰে ডাবৰ পানী৷ আহতগুৰি পৰ্যন্ত সম্প্ৰসাৰিত এই ডাবৰ বজাৰখন মাত্ৰ কেইজনমান লোকে প্ৰায় 30 বছৰ পূৰ্বে আৰম্ভ কৰিছিল৷ 30 ৰ পৰা 35 টকা পৰ্যন্ত মূল্যত বিক্ৰী হয় প্ৰতিটো ডাব। ব্যৱসায়টোৰ সৈতে প্ৰত্যক্ষ আৰু পৰোক্ষভাৱে জড়িত হৈ আছে কেবাশতাধিক লোক। জিলা দুইখনৰ বিভিন্ন গ্ৰামঞ্চলৰ পৰা ক্ৰয় কৰি পথৰ দাঁতিত এনেদৰে ডাব বিক্ৰী কৰি পৰিয়াল পোহপাল দি আছে বহুতে। ব্যৱসায়টোত জড়িত হৈ আছে একাংশ মহিলাও। কিন্তু এইসকল লোকে বহু সময়ত ভোগে নিৰপত্তাহীনতাত। কিয়নো চাৰিলেনযুক্ত পথৰ দাঁতিত বাহনৰ দ্ৰুত বেগত আতংকৰ মাজতে এওঁলোকে বিক্ৰী কৰি আহিছে ডাব। সেয়ে কোকাকোলা, পেপচি আদি বিভিন্ন কোম্পানীক প্ৰত্যাহ্বান জনাই ৰাজ্যৰ ভিতৰতে বিখ্যাত এই ঠেকেৰাগুৰি অঞ্চলত ডাব বিক্ৰী কৰা ব্যৱসায়ী সকলে অঞ্চলটোত বজাৰ গৃহ নিৰ্মাণৰ দাবী উত্থাপন কৰিছে ৷
