ৰাভা দিৱসতেই চৰ্চালৈ অহা আমগুৰিৰ এজন কমৰেড

স্বাধীনতা আন্দোলনত জপিয়াই বহুবাৰ কাৰাবাস খটা আৰু হাতত গুলী লগাৰ পিচতো আজিও পূৰ্ণানন্দ গগৈয়ে নাপালে কোনো চৰকাৰী সুবিধা ।

আমগুৰি , ২০ জুন : আজি কলাগুৰু বিষ্ণু ৰাভা দিৱস । এই ৰাভা দিৱসতে চৰ্চালৈ আহিছে এজন কমৰেডৰ প্ৰসংগ । শিৱসাগৰ জিলাৰ আমগুৰিৰ দ্বিতীয় কমৰেড হিচাপে পৰিচিত ৯৭ বছৰীয়া এই চৰ্চিত ব্যক্তিজন হ'ল কমৰেড পূৰ্ণানন্দ গগৈ । নেতাজী সুভাষ চন্দ্ৰ বসুৰ আজাদ হিন্দ ফৌজৰ অন্যতম এজন সেনানী তথা স্বাধীনতা আন্দোলনৰ বীৰ যোদ্ধা পূৰ্ণানন্দ গগৈ আছিল বিষ্ণু প্ৰসাদ ৰাভাৰ দেহৰক্ষী । ১৯৪৫ চনৰ পৰা এবছৰ তিনিমাহ ধৰি দেহৰক্ষী হিচাপে কৰ্মৰত আছিল পূৰ্ণানন্দ গগৈ । জননেতা খগেন বৰবৰুৱাৰো দেহৰক্ষী হিচাপে কৰ্মৰত পূৰ্ণানন্দ গগৈয়ে স্বাধীনতাৰ মুখ দেখিলে যদিও নিজে পৰাধীন হৈ ৰ'ল । স্বাধীনতা আন্দোলনত জপিয়াই বহুবাৰ কাৰাবাস খটা আৰু হাতত গুলী লগাৰ পিচতো আজিও পূৰ্ণানন্দ গগৈয়ে নাপালে কোনো চৰকাৰী সুবিধা । মুক্তিযুঁজাৰু পেঞ্চনৰ বাদেই এইজন সেনানীক ৰজাঘৰে নিদিলে এটা চৰকাৰী বাসগৃহ । স্বাধীনতা আন্দোলনৰ বহু ঘটনা-পৰিঘটনাৰ সাক্ষী পূৰ্ণানন্দ গগৈৰ এই দুৰৱস্থা দেখিও চকু খোল খাবনে জাতীয় নায়ক সৰ্বানন্দ সোণোৱালৰ ?