কংগ্ৰেছৰ বাবে গ্ৰহণ কৰিব লাগিব চছমাজ্যোতি আঁচনিঃ ৰূপক শৰ্মা

বিজেপি চৰকাৰৰ শাসন কালত ৰাজ্যত উন্নয়নমূলক কাম সম্পন্ন হোৱা নাই বুলি কংগ্ৰেছে উত্থাপন কৰা অভিযোগ সন্দৰ্ভত প্ৰতিক্ৰিয়া প্ৰকাশ নগাঁও সদৰ সমষ্টিৰ বিধায়ক ৰূপক শৰ্মাৰ । কংগ্ৰেছক সমালোচনা কৰি তেওঁ কয় যে, বিজেপিয়ে উন্নয়নমূলক কাম কৰা স্বত্বেও সেইবোৰ দেখি নোপোৱাসকলৰ বাবে চছমাজ্যোতি আঁচনি গ্ৰহণ কৰি চছমা বিতৰণ কৰিব লাগিব । নগাঁৱত এক সংবাদমেল সম্বোধন কৰি এই মন্তব্য কৰে বিধায়গৰাকীয়ে ।

নগাঁও, ২৬ ফেব্ৰুৱাৰী: নিৰ্বাচনৰ দিন চমু চাপি অহাৰ লগে লগে কংগ্ৰেছ আৰু বিজেপিৰ মাজত আৰম্ভ হৈছে বোকা ছটিওৱাৰ ৰাজনীতি । ৰাজ্যত উন্নয়নমূলক কাম কৰাক লৈ এটা দলে আনটো দলক সমলোচনাৰে থকা-সৰকা কৰিছে । এফালে, বিজেপিয়ে কংগ্ৰেছৰ শাসন কালত দুৰ্নীতি, অপশাসন হোৱাৰ অভিযোগ তুলিছে আনহাতে, কংগ্ৰেছে অভিযোগ উত্থাপন কৰিছে যে, বিজেপিয়ে ৰাজ্যত উন্নয়নমূলক কাম কৰাত হেমাহি কৰিছে ।

এই সন্দৰ্ভত এক সংবাদমেল সম্বোধন কৰি প্ৰতিক্ৰিয়া প্ৰকাশ কৰিছে নগাঁও সদৰ সমষ্টিৰ বিধায়ক ৰূপক শৰ্মাই । তেওঁ কয় যে, বিজেপিয়ে কৰা উন্নয়নমূলক কাম দেখা নোপোৱা কংগ্ৰেছৰ বাবে চছমাজ্যোতি আঁচনি গ্ৰহণ কৰিব লাগিব । কেৱল নগাঁও সদৰ সমষ্টিতে নহয়, বিজেপিৰ শাসন কালত ৰাজ্যৰ মুঠ ১২৬টা সমষ্টিত সম উন্নয়ন হৈছে । বিজেপিৰ বিধায়ক থকা সমষ্টিৰ সমান্তৰালকৈ বিৰোধী বিধায়কৰ সমষ্টিতো চৰকাৰে সমানে পুঁজিৰ আবন্টন দিছে ।

বিজেপি চৰকাৰৰ দিনত ৰাস্তা-ঘাটৰ পৰা আৰম্ভ কৰি স্বাস্থ্যখণ্ডলৈকে সকলো ক্ষেত্ৰতে বিকাশ সম্ভৱ হৈছে । সংবাদমেলত বিৰোধীক সমালোচনা কৰাৰ লগতে বিজেপি চৰকাৰৰ উন্নয়নমূলক কামৰ এক খতিয়ানো দাঙি ধৰে নগাঁও সদৰ সমষ্টিৰ বিধায়ক ৰূপক শৰ্মাই । লগতে বিধানসভা নিৰ্বাচনত বিজেপিয়ে পূৰ্বতকৈও অধিক আসন লাভ কৰি জয় লাভ কৰি চৰকাৰ গঠন কৰিব বুলিও মন্তব্য কৰে বিধায়কগৰাকীয়ে ।

লগতে পঢ়ক:চিৰাঙত ড্ৰাগছসহ গ্ৰেপ্তাৰ যুৱক