চামগুৰি,20 জানুৱাৰীঃ নগাঁও জিলাৰ বৰদোৱা ভোগালী উৎসৱ উদযাপন সমিতিৰ উদ্যোগত বটদ্ৰৱা থানৰ জাপি বাটচৰাৰ সমীপত সোমবাৰৰ পৰা দুদিনীয়া বৰ্ণাঢ্য কাৰ্যসূচীৰে অনুষ্ঠিত হোৱা ভোগালী উৎসৱৰ মঙলবাৰে নিশা সামৰণি পৰে । ভোগালী উৎসৱ কাৰ্যসূচী অনুসৰি সোমবাৰৰ পুৱাৰে পৰা বিভিন্ন সাংস্কৃতিক অনুষ্ঠানৰ পাছতে বটদ্ৰৱা আৰু ইয়াৰ দাঁতিকাষৰীয়া অঞ্চলৰ বয়োজেষ্ঠ আৰু বিশিষ্ট ব্যক্তিসকলৰ সম্বৰ্ধনা জনায় উদযাপন সমিতিয়ে ।
উল্লেখযোগ্য যে,যোৱা কালি ১৯ জানুৱাৰীৰ সন্ধিয়া ৫ বজাত অনুষ্ঠিত হয় কুইজ প্ৰতিযোগিতা। বটদ্ৰৱাৰ জেষ্ঠ সাংবাদিক তথা জনপ্ৰিয় কুইজ মাষ্টাৰ দিব্যজ্যোতি বৰুৱাৰ পৰিচালনাৰে অনুষ্ঠিত 'অসমীয়া সংস্কৃতিৰ কুইজ' শীৰ্ষক কুইজ প্ৰতিযোগিতাৰ পাছতে সন্ধ্যা ৮ বজাৰ পৰা অনুষ্ঠিত হয় সাংস্কৃতিক সন্ধিয়া । সাংস্কৃতিক অনুষ্ঠানত অসমৰ জনপ্ৰিয় কন্ঠশিল্পী দিপলীনা ডেকা,বৰুণ বিকাশ আৰু আৰোহন বৰদলৈৰ গীতৰ অনুষ্ঠানে ৰাইজক মন্ত্ৰমুগ্ধ কৰা দেখা যায় ৷
লগতে পঢ়কঃ অসমত বসবাস কৰা বড়ো,আদিবাসী,নেপালী সকলোৱে খিলঞ্জীয়া : মন্ত্রী ৰঞ্জিত দত্ত
