বটদ্ৰৱা সংখ্যালঘু যুৱ মঞ্চৰ বিৰুদ্ধে গোচৰ ৰুজু এ বি ভি পি ৰ

ফেচবুক পেজত সাম্প্ৰদায়িক মন্তব্য "বটদ্ৰৱা সংখ্যালঘু যুৱ মঞ্চ" নামৰ সংগঠনটোৰ ৷ সংগঠনটোৰ বিৰুদ্ধে বটদ্ৰৱা থানাত গোচৰ ৰুজু অখিল ভাৰতীয় বিদ্যাৰ্থী পৰিষদৰ

বটদ্ৰৱা, 13 জুনঃ বটদ্ৰৱা সংখ্যালঘু যুৱ মঞ্চ নামৰ সংগঠনে ফেচবুক পেজত কৰা সাম্প্ৰদায়িক মন্তব্যৰ বিৰোধিতা কৰি বৃহস্পতিবাৰে বটদ্ৰৱা আৰক্ষী থানাত এজাহাৰ দাখিল কৰে অখিল ভাৰতীয় বিদ্যাৰ্থী পৰিষদৰ বটদ্ৰৱা শাখাই । অভিযোগ অনুসৰি বিগত কিছুদিন ধৰি "বটদ্ৰৱা সংখ্যালঘু যুৱ মঞ্চ" নামৰ সংগঠনটোৱে ফেচবুক পেজৰ জৰিয়তে অসমৰ সম্প্ৰীতি বিনষ্ট কৰাৰ অপচেষ্টাত লিপ্ত হৈছে । সংগঠনটোৱে ফেচবুকত সাম্প্ৰদায়িক মন্তব্য দিয়াৰ উপৰিও বিভিন্ন ভাবুকি প্ৰদানেৰে সাম্প্ৰদায়িক উচটনি দিয়াও পৰিলক্ষিত হৈছে ।

তাৰোপৰি পেজটোত বাংলাদেশৰ কিছুমান সাংস্কৃতিক অনুষ্ঠানৰ ছবি অসমৰ বুলি অপপ্ৰচাৰ কৰি অসমীয়া সংস্কৃতিৰ বিৰুদ্ধে অপপ্ৰচাৰত লিপ্ত হোৱাৰো অভিযোগ উত্থাপন হৈছে । অখিল ভাৰতীয় বিদ্যাৰ্থী পৰিষদৰ অভিযোগ সংগঠনটোৰ এনে অপৰাধমূলক কামকাজে অসমৰ সাম্প্ৰদায়িক সম্প্ৰীতি বিনষ্ট কৰাৰ থল আছে ৷ সেয়ে এই ফেচবুক পেজটোৰ লগত জড়িত "বটদ্ৰৱা সংখ্যালঘু যুৱ মঞ্চ" নামৰ সংগঠনটোৰ বিৰুদ্ধে গোচৰ ৰুজু কৰাৰ লগতে যথোচিত ব্যৱস্থা গ্ৰহণৰ দাবী জনাইছে অখিল ভাৰতীয় বিদ্যাৰ্থী পৰিষদৰ বটদ্ৰৱা শাখাই ৷