বিধায়িকা আঙুৰলতাৰ সমষ্টিত শিক্ষা খণ্ডৰ নগ্ন ছবি

বটদ্ৰৱা সমষ্টিৰ বিধায়িকা আঙুৰলতা ডেকাক প্ৰায়ে নিজ সমষ্টিত সক্ৰিয় হৈ থকা দেখা যায় ৷ কিন্তু তেওঁৰ সমষ্টিৰ অন্তৰ্গত বটদ্ৰৱা বৰভেটি মুক্তাব বিদ্যালয়ৰ দৃশ্য দেখিলে হতবাক হ'ব আপুনি ৷

বটদ্ৰৱা, 18 চেপ্তেম্বৰঃ বিধায়িকা আঙুৰলতা ডেকাৰ সমষ্টিত শিক্ষা বিভাগৰ নগ্ন ৰূপ ৷ আন্তঃগাঁথনিৰ অভাৱত সংকটত এখন বিদ্যালয় ৷ বটদ্ৰৱা শিক্ষা খণ্ডৰ অন্তৰ্গত বটদ্ৰৱা বৰভেটি মুক্তাব বিদ্যালয়খনলৈ বছৰ বছৰ ধৰি নাহিল কোনো পৰিৰ্ৱতন ৷ ১৯৭১ চনতে স্থাপিত বিদ্যালয়খনলৈ যাবলৈ নাই কোনো পথৰ ব্যৱস্থা যাৰ বাবে পানীৰ মাজত ডুবি থকা বিদ্যালয়লৈ বাঁহৰ সাকো পাৰ হৈ বিপদসংকুলভাৱে যাবলগীয়া হয় কণ কণ ছাত্ৰ ছাত্ৰী ৷ আনহাতে বিদ্যালয়খনৰ ভূমিও এতিয়া বেদখলকাৰীৰ কৱলত ৷ বেদখলকাৰীয়ে বৃহৎ আকাৰৰ পুখুৰী খন্দাৰ ফলত ধ্বংসৰ দিশলৈ গতি কৰিছে বিদ্যালয়খন ৷

এই বিষয়ে বটদ্ৰৱা শিক্ষা খণ্ডৰ কাৰ্যালয়ত আৰু বটদ্ৰৱা সমষ্টিৰ বিধায়িকা আঙুৰলতা ডেকাক বিদ্যালয়খনৰ শিক্ষক শিক্ষয়িত্ৰী সকলে বাৰম্বাৰ জনাই আহিছে যদিও কোনো ধৰণৰ গুৰুত্ব প্ৰদান কৰা পৰিলক্ষিত হোৱা নাই ৷ সেয়ে এতিয়া বিদ্যালয়খনৰ শিক্ষকে ছাত্ৰ ছাত্ৰীক কেতিয়াবা কোনো লোকৰ ঘৰৰ চোতালত, আন কেতিয়াবা গছৰ তলতেই পাঠদান কৰিবলৈ বাধ্য হৈছে ৷