অৱসৰপ্ৰাপ্ত শিক্ষয়িত্ৰীৰ একাউন্টৰ পৰা দুৰ্বৃত্তই লুটিলে ধন

নগাঁৱৰ এটা মন্দিৰত হুকহুকাই কান্দিলে এগৰাকী অৱসৰপ্ৰাপ্ত শিক্ষয়িত্ৰীয়ে । মহিলাগৰাকীৰ একাউন্টৰ পৰা দুৰ্বৃত্তই লুটিলে ধন । এ টি এমৰ পৰা ধন উলিওৱাৰ সময়তে এগৰাকী বোৰ্খা পৰিহিত মহিলাই সলাই নিলে মহিলাগৰাকীৰ এ টি এম ।

নগাঁও, 7 নবেম্বৰ: এ টি এমৰ পৰা ধন উলিয়াওঁতে সাৱধান হঁওক আপুনি । ওচৰত কোনো অজ্ঞাত ব্যক্তি থাকিলে সাৱধানে ৰাখক আপোনাৰ এ টি এম । গোপন ৰাখক আপোনাৰ পাছৱাৰ্ড । কাৰণ এ টি এমত খাপ পিটি থাকে দুৰ্বৃত্তই । লুটি নিব পাৰে আপোনাৰ সমস্ত সাঁচতীয়া ধন । এন এক ঘটনাই সংঘটিত হৈছে নগাঁৱত । নগাওঁ চহৰৰ শিৱ মন্দিৰত উপস্থিত হৈ হুকহুকাই কান্দিছে এগৰাকী মহিলাই । মহিলাগৰাকী নগাঁৱৰ বুঢ়াগোহাঁই আদৰ্শ গাঁৱৰ এগৰাকী অৱসৰপ্ৰাপ্ত শিক্ষয়িত্ৰী, নাম কনকলতা হাজৰিকা । ২০১৬ চনতে অৱসৰ গ্ৰহণ কৰা কনকলতা হাজৰিকাই নিজৰ পেঞ্চনৰ ধনেৰে চলাই আছিল পৰিয়াল । কিছুদিন পূৰ্বে মহিলাগৰাকী আক্ৰান্ত হৈছিল বৃক্কৰ এক জটিল ৰোগতো । মাটি বিক্ৰী কৰা ধনেৰে চিকিৎসা গ্ৰহণ কৰি আছিল মহিলাগৰাকীয়ে । মাটি বিক্ৰীৰ কিছু ধন জমা কৰি ৰাখিছিল ভাৰতীয় ষ্টেট বেংকত থকা নিজৰ একাউন্টত ৷

৩০ অক্টোবৰৰ দিনা মহিলাগৰাকীয়ে কঠীয়াতলীস্থিত এছ বি আইৰ এটি এমৰ পৰা ধন উলিয়াইবলৈ গৈ এতিয়া সৰ্বস্বান্ত হল মহিলাগৰাকী । ধন উলিওৱাৰ সময়ত এ টি এমৰ ভিতৰত আছিল এগৰাকী বোৰ্খা পৰিহিত মহিলা । সেই সময়তে সলনি হৈছিল অসুস্থ বৃদ্ধ মহিলাগৰাকীৰ এ টি এম । মহিলাগৰাকীৰ এ টি এমৰ বিপৰীতে মহিলাগৰাকীৰ এ টি এমৰ বেগত ভৰাই দিয়া হৈছিল তাফজ্জুল ইছলাম নামৰ এজন লোকৰ এ টি এম কাৰ্ড । একেদিনাই মহিলাগৰাকীৰ একাউন্টৰ পৰা এ টি এম যোগে ধন উলিওৱাৰ লগতে আন এটা একাউণ্টলৈ ট্ৰেন্সফাৰ হৈছিল মুঠ এক লাখ ১২ হাজাৰ টকা । পৰৱৰ্তী সময়ত ধন উলিয়াবলৈ যোৱাৰ সময়ত পোহৰলৈ আহিছে এই ঘটনা । একাউন্টৰ পৰা সমূদায় ধন উলিয়াই নিয়াৰ পিছত মহিলাগৰাকীয়ে বেংক কৰ্তৃপক্ষক অৱগত কৰাৰ উপৰিও নগাওঁ সদৰ আৰক্ষী থানাত দাখিল কৰিছে এজাহাৰ । এতিয়া ভাত এমুঠিৰ চিন্তাত মন্দিৰত উপস্থিত হৈ হুকহুকাই কান্দিছে মহিলাগৰাকীয়ে । এতিয়া প্ৰশ্ন এ টি এমত থকা চি চি টি ভিৰ ফুটেজ অথবা একাউণ্টলৈ ধন ট্ৰেন্সফাৰ কৰাৰ পিছতো জালত পৰিব নে এনে অপৰাধী ।

লগতে পঢ়ক: প্ৰধানমন্ত্ৰী নৰেন্দ্ৰ মোডীৰ বাসগৃহত উপস্থিত মুখ্যমন্ত্ৰী সৰ্বানন্দ সোণোৱাল