কামপুৰ, 12 এপ্ৰিল: কামপুৰত এতিয়া হাহাকাৰ অৱস্থা খিলঞ্জীয়াৰ ৷ 1930 চনৰ নথি-পত্ৰ বিচাৰি হাহাকাৰ কৰিছে খিলঞ্জীয়াই ৷ অস্তিত্ব হেৰুওৱাৰ শংকাত ভুগিছে কামপুৰৰ একাংশ খিলঞ্জীয়াই ৷
কামপুৰত ভূমিৰ নথি-পত্ৰ সম্পৰ্কীয় শুনানিত বেমেজালিৰ অভিযোগ ৷ উল্লেখ্য যে কামপুৰৰ বৰপথাৰ, শিঙিমাৰী, লংজাপ পঞ্চায়তৰ অন্তৰ্গত চৰকাৰী মুক্ত বনাঞ্চলত বসবাস কৰা লোকসকলক 1930 চনৰ নথি বিচৰাত এতিয়া হাহাকাৰ পৰিস্থিতিৰ সন্মুখীন হ'ব লগা হৈছে এই অঞ্চলকেইটাৰ বাসিন্দাসকল ৷ ৭৫ বছৰ চৰকাৰী ভূমিত বসবাস কৰিলেহে এইসকল লোকে লাভ কৰিব ভূমিৰ অধিকাৰ ৷ আনহাতে ST সকলক ৫ বছৰ বসতি কৰাৰ পাচতেই অগ্ৰাধিকাৰ দিয়াৰ বিপৰীতে OBC, SC, General সকলৰ পৰা 1930 চনৰ পৰা বসবাস কৰাৰ নথি-পত্ৰ বিচৰাত এতিয়া কামপুৰ স্বৰাজ ভৱনত হাহাকাৰ পৰিস্থিতিৰ সন্মুখীন হৈছে খিলঞ্জীয়া ৰাইজে (Allegations of Irregularities in Kampur) ৷
উল্লেখ্য যে মঙলবাৰে কামপুৰ স্বৰাজ ভৱনত তিনিওটা পঞ্চায়তৰ ৰাজহুৱা ভূমিৰ নথি-পত্ৰৰ শুনানিত বহু লোকৰ নাম নথকাৰ কথা বিভাগীয় কৰ্তৃপক্ষই ঘোষণা কৰা পাচতেই বিমোৰত পৰিছে ভুক্তভোগী একাংশ বাসিন্দা ৷ 1930 চনৰ নথি-পত্ৰ এতিয়া লাভ কৰাটো কেনেকৈ সম্ভৱ বুলি তেওঁলোকে প্ৰশ্ন কৰিছে চৰকাৰক ৷ 1930 চনৰ নথি-পত্ৰ নাথাকিলেই তেওঁলোক বিদেশী হৈ নাযায়, ভূমিৰ অধিকাৰ তেওঁলোকে পাব লাগে বুলি মন্তব্য কৰিছে ৷