চামগুৰি, 22 ছেপ্টেম্বৰ : নগাঁৱত চূড়ান্ত প্ৰহসনত পৰিণত হ'ল চাৰিলেনযুক্ত ৰাজপথ নিৰ্মাণৰ কাম ৷ নগাঁৱৰ উৰিয়াগাঁও বাইপাছৰ পৰা কলিয়াবৰ পৰ্যন্ত চাৰিলেনযুক্ত ৰাজপথচোৱা বিসংগতিপূৰ্ণভাৱে নিৰ্মাণ কৰি এতিয়া টালি-টোপোলা বান্ধি সন্তৰ্পণে বিদায় লোৱাৰ যো-জা চলাইছে নিৰ্মাণকাৰী প্ৰতিষ্ঠানে । বিশেষকৈ পুৰণিগুদাম আৰু চামগুৰিৰ বৃহত্তৰ অঞ্চলৰ মাজেৰে পাৰ হৈ যোৱা ১২৭ নং ৰাষ্ট্ৰীয় ঘাইপথচোৱা চাৰিলেনযুক্ত ৰাজপথলৈ উন্নীতকৰণত নিয়োজিত পি.আৰ.এল. আৰু গংগাসাগৰ নামৰ কোম্পানী দুটাই নিৰ্মাণকাৰ্য আধৰুৱা কৰাত এতিয়া বহু যাত্ৰী অনাকাংক্ষিত বিপদত পৰাৰ শংকা বৃদ্ধি পাইছে ৷
অতিশয় ব্যস্ত ৰাজপথটোৰে দিনে-নিশাই অহা-যোৱা কৰে বিভিন্ন যাত্ৰী, অসংখ্য যান-বাহন ৷ নিৰ্মাণকাৰী প্ৰতিষ্ঠান দুটাই ৰাইজৰ অনুৰোধকো ভেঙুচালি কৰি অতদিনে নিৰ্মাণ সম্পূৰ্ণ নকৰিলে পুৰণিগুদাম, চামগুৰি আদি অঞ্চলত ৰাজপথৰ দাঁতিৰ অতিৰিক্ত অংশৰ কাম ৷ লগতে নিৰ্মাণ নকৰিলে যান-বাহন পাৰ্কিংৰ স্থানসমূহ, নকৰিলে বৰষুণৰ পানী নিৰ্দিষ্ট স্থানলৈ বোৱাই নিয়াৰ সু-ব্যৱস্থা ৷