নগাঁও, 30 ডিচেম্বৰ: 'কা' আন্দোলনত জড়িত হৈ বিগত এটা বছৰে কাৰাবন্দী হৈ থকা কৃষক মুক্তি সংগ্ৰাম সমিতিৰ নেতা অখিল গগৈৰ জামিন লাভৰ সম্ভাৱনা প্ৰকট হৈ পৰিছে । জানুৱাৰী মাহৰ প্ৰথম সপ্তাহতে মুকলি আকাশৰ তললৈ অহাৰ সম্ভাৱনা আছে কৃষক নেতা অখিল গগৈৰ । 'নিয়া'ৰ এটা গোচৰত ইতিমধ্যেই অখিল গগৈয়ে জামিন লাভ কৰিছে যদিও চানমাৰী থানাৰ এটা গোচৰত সম্প্ৰতি কৰাবন্দী হৈ আছে অখিল গগৈ ।
ইপিনে 'নিয়া'ৰ এটা গোচৰত লাভ কৰা জামিন নাকচ কৰিবলৈ 'নিয়া'ই পুনৰ আবেদন জনাইছে বুলি উল্লেখ কৰে অখিল গগৈৰ গোচৰত জড়িত অধিবক্তা কৃষ্ণ গগৈয়ে । অৱশ্যে চৰকাৰে ষড়যন্ত্ৰ মূলকভাৱে পুনৰ গোচৰ জাপি দিয়াৰো সম্ভাৱনা আছে বুলি আশংকা ব্যক্ত কৰিছে অধিবক্তা কৃষ্ণ গগৈয়ে । চৰকাৰে পুনৰ গোচৰ জাপি দিলে অখিল গগৈৰ মুক্তিৰ বাট বন্ধ হোৱাৰো আশংকা কৰিছে অধিবক্তাগৰাকীয়ে ।
'কা' আন্দোলনৰ নেতৃত্ব দি কাৰাবন্দী হোৱা অখিল গগৈৰ মুক্তিৰ দাবীত ৰাজ্যজুৰি প্ৰতিবাদ অব্যাহত থকাৰ পিছতো কাৰমুক্তি নোহোৱা অখিল গগৈৰ মুক্তি কেতিয়া ? এয়াই এতিয়া এক ডাঙৰ প্ৰশ্ন হৈ পৰিছে ৷
লগতে পঢ়ক: 31 জানুৱাৰীলৈ বৃদ্ধি কৰা হৈছে মহাৰাষ্ট্ৰৰ লক ডাউন