শ্বহীদৰ ত্যাগক শ্ৰদ্ধাৰে সুঁৱৰিলে ৰহা আঞ্চলিক ছাত্ৰ সন্থাই

আজি শ্বহীদ দিৱস । খৰ্গেশ্বৰ তালুকদাৰসহ অসম আন্দোলনৰ ৮৫৫ গৰাকী শ্বহীদৰ ত্যাগক স্মৰণ কৰে ৰহা আঞ্চলিক ছাত্ৰ সন্থাই । 'কা' আন্দোলনৰ সময়ত প্ৰাণ আহুতি দিয়া ৫ গৰাকী শ্বহীদলৈও শ্ৰদ্ধাঞ্জলি জ্ঞাপন কৰে আছুৱে ।

ৰহা, ১০ ডিচেম্বৰ: ৰাজ্যৰ ভিন্ন প্ৰান্তৰ লগতে নগাঁৱৰ ৰহাতো আজি শ্বহীদ দিৱস পালন কৰা হয় । শ্বহীদ দিৱসৰ পৱিত্ৰ ক্ষণত অসম আন্দোলনৰ জাতীয় শ্বহীদসকলক শ্ৰদ্ধাৰে সোঁৱৰে ৰহা আঞ্চলিক ছাত্ৰ সন্থাই । অসমৰ অস্তিত্ব ৰক্ষাৰ মহাসংগ্ৰাম অসম আন্দোলনত মাতৃভূমিৰ স্বাভিমান ৰক্ষা কৰিবলৈ গৈ প্ৰাণ আহুতি দিছিল এইসকল শ্বহীদে । এই আন্দোলনৰ প্ৰথম শ্বহীদ খৰ্গেশ্বৰ তালুকদাৰে ১৯৭৯ চনৰ ১০ ডিচেম্বৰত চৰকাৰৰ নিৰ্দেশ পালনকাৰী একাংশ বিষয়াৰ নিৰ্মম অত্যাচাৰৰ বলি হৈ মৃত্যুক সাৱটি লৈছিল ।

তেখেতৰ মৃত্যু দিনটো প্ৰতিবছৰে সদৌ অসম ছাত্ৰ সন্থাই ৰাইজৰ সহযোগত জাতীয় শ্বহীদসকলৰ পৱিত্ৰ স্মৃতিত শ্বহীদ দিৱস হিচাপে পালন কৰি আহিছে । অসমৰ অন্যান্য প্ৰান্তৰ দৰে ৰহাতো আজি শ্বহীদসকলৰ পবিত্র স্মৃতিত ৰহা আঞ্চলিক ছাত্র সন্থাই বন্তি প্ৰজ্বলন কৰি শ্বহীদৰ ত্যাগক স্মৰণ কৰে । লগতে 'কা' আন্দোলনৰ ৫ গৰাকী শ্বহীদৰ ত্যাগক সন্মান জনাই এই আইন বাতিল নোহোৱা পৰ্যন্ত প্ৰতিবাদ অব্যাহত ৰখাৰ হুংকাৰ দিয়ে নগাঁও জিলা ছাত্ৰ সন্থাৰ শিক্ষা সম্পাদক সঞ্জয় কাকতিয়ে ।

লগতে পঢ়ক:জইছ-ই-মহম্মদৰ সন্ত্ৰাসবাদীক গ্ৰেপ্তাৰ