নগাঁৱত মৰিগাঁৱৰ চোৰৰ দলৰ টিঘিলঘিলনি

নগাঁৱত এতিয়া টিঘিলঘিলাই ফুৰিছে মৰিগাঁৱৰ এটা চোৰৰ দল ৷ দলটোৰ লক্ষ্য সোণৰ গহনা লুটপাত কৰা ৷ ইতিমধ্যে মৰিগাঁৱৰ চোৰৰ দলৰ এজন সদস্য জালত পৰিছে নগাঁও আৰক্ষীৰ ৷

নগাঁও, 20 ছেপ্তেম্বৰ:এতিয়াৰ পৰা সাৱধান হওক নগাঁওবাসী ৷ কাৰণ নগাঁৱত এতিয়া খোপনি পুতিছে মৰিগাঁও জিলাৰ এটা চোৰৰ দলে ৷ এই চোৰৰ দলটোৱে ন ন কৌশলেৰে সুবিধা লৈ বিভিন্নজনৰ ঘৰৰ পৰা লুটপাত কৰি আহিছে সোণৰ গহনা ৷ এই প্ৰৱঞ্চকৰ দলটোৰ এজন সদস্য ইতিমধ্যেই নগাঁও আৰক্ষীৰ জালত পৰিছে ৷

প্ৰাপ্ত তথ্য মতে, নগাঁও আৰক্ষীৰ নগৰ শাখাৰ আৰক্ষীৰ এটা দলে টহল দি থকাৰ সময়তে চাইকেলেৰে গৈ আছিল চাৰিজনীয়া যুৱকৰ এটা দল ৷ যুৱকৰ দলটোৰ ওপৰত সন্দেহ ওপজে টহল দি থকা আৰক্ষীৰ ৷ লগে লগে যুৱকৰ দলটোক আৰক্ষীয়ে ৰবলৈ সংকেত দিয়ে যদিও যুৱকৰ দলটোৱে আৰক্ষীৰ সংকেত অমান্য কৰি আঁতৰি যাবলৈ চেষ্টা কৰে ৷ যাৰ বাবে আৰক্ষীৰ দলটোৱেও যুৱকৰ দলটোক খেদি যায় যদিও দলটোৰ তিনিজন যুৱক পলাই যাবলৈ সক্ষম হয় ৷

অৱশ্যে মৰিগাঁৱৰ লোহিত হীৰা নামৰ যুৱকজনক আটক কৰে আৰক্ষীৰ দলটোৱে ৷ ধৃত লোহিত হীৰাৰ পৰা আৰক্ষীয়ে বৃহৎ পৰিমাণৰ সোণৰ গহনা উদ্ধাৰ কৰিবলৈ সক্ষম হয় ৷ মৰিগাঁৱৰ পৰা নগাঁৱলৈ আহি বিভিন্নজনৰ ঘৰৰ পৰা সোণৰ গহনা লুটপাত কৰাৰ তথ্য পোহৰলৈ আহিছে লোহিত হীৰা নামৰ এই যুৱকজনৰ বিৰুদ্ধে ৷

উল্লেখ্য যে, চোৰ ডকাইতকে ধৰি বিভিন্ন অপৰাধৰ বিৰুদ্ধে এতিয়া দিনে নিশাই সষ্টম হৈ আছে নগাঁও আৰক্ষী ৷ ড্ৰাগছকে ধৰি অন্যান্য অপৰাধৰ বিৰুদ্ধে নগাঁও আৰক্ষীয়ে ইতিমধ্যেই লাভ কৰিছে বহু সফলতা ৷ ইফালে অধিক তথ্যৰ বাবে ধৃত লোহিত হীৰাক বৰ্তমান জেৰা অব্যাহত ৰাখিছে আৰক্ষীয়ে ৷

লগতে পঢ়কঃনুনমাটিত ড্ৰাগছৰ বিৰুদ্ধে আৰক্ষীৰ সজাগতামূলক সভা