কলিয়াবৰত ৩৭ নং ৰাষ্ট্ৰীয় ঘাইপথ অৱৰোধ

ভোগালীৰ উৰুকাত অথন্তৰ ৷ কলিয়াবৰত ৩৭ নং ৰাষ্ট্ৰীয় ঘাইপথ অৱৰোধ কৰিলে স্থানীয় ৰাইজে ৷ কাজিৰঙা ৰাষ্ট্ৰীয় উদ্যানৰ অন্তৰ্গত বুঢ়াপাহাৰ বনাঞ্চলৰ পতাহী বিলত প্ৰতি বছৰে ভোগালী বিহুৰ উৰুকাৰ পুৱাই মাছ মাৰে স্থানীয় লোকে ৷ ভোগালী বিহুৰ উৰুকাৰ পুৱা মাছ মাৰিবলৈ অনুমতি দিয়ে বনাঞ্চলৰ কৰ্তৃপক্ষই ৷ পিছে এইবাৰ নিৰাশ হ'ল মাছ ধৰিবলৈ অহা সহস্ৰাধিক ৰাইজ । নাপালে এটাও মাছ ৷ বন বিভাগৰ ষড়যন্ত্ৰৰ কাৰণে ৰাইজে এটাও মাছ নাপালে বুলি ৰাইজে ক্ষোভ প্ৰকাশ কৰি ৩৭ নং ৰাষ্ট্ৰীয় ঘাইপথ অৱৰোধ কৰে ।

কলিয়াবৰ , 14 জানুৱাৰী : কলিয়াবৰৰ সমীপৰ কাজিৰঙা ৰাষ্ট্ৰীয় উদ্যানৰ অন্তৰ্গত বুঢ়াপাহাৰ বনাঞ্চলৰ পতাহী বিলত প্ৰতি বছৰে ভোগালী বিহুৰ উৰুকাৰ পুৱাই মাছ মাৰে স্থানীয় লোকে ৷ ভোগালী বিহুৰ উৰুকাৰ পুৱা মাছ মাৰিবলৈ অনুমতি দিয়ে বনাঞ্চলৰ কৰ্তৃপক্ষই ৷ শীতৰ প্ৰকোপকো নেউচি কাজিৰঙা ৰাষ্ট্ৰীয় উদ্যানৰ কাষৰীয়া অঞ্চলৰ লগতে বহু নিলগৰ পৰা মাছ ধৰাৰ আনন্দৰ উৎসৱত যোগ দিয়ে সহস্ৰাধিক লোকে ৷ পিছে এইবাৰ নিৰাশ হ'ল মাছ ধৰিবলৈ অহা সহস্ৰাধিক ৰাইজ । নাপালে এটাও মাছ ৷ তাতেই ক্ষোভৰ উদ্গীৰণ হ'ল মাছ ধৰিবলৈ যোৱা সাধাৰণ ৰাইজৰ । বন বিভাগৰ ষড়যন্ত্ৰৰ কাৰণে ৰাইজে এটাও মাছ নাপালে বুলি ৰাইজে ক্ষোভ প্ৰকাশ কৰি ৩৭ নং ৰাষ্ট্ৰীয় ঘাইপথ অৱৰোধ কৰে ।

ৰাইজৰ মতে যিটো সময়ত অত্যাধিক মূল্যবৃদ্ধিৰ ফলত সাধাৰণ ৰাইজ কোঙা হৈ পৰিছে সেইসময়ত এনেদৰে পতাহী বিলত এটাও মাছ নোপোৱাতো সঁচাই দুখৰ কথা । সাধাৰণ ৰাইজক বন বিভাগে অন‍্যায় কৰিছে বুলি অভিযোগ স্থানীয় ৰাইজৰ ৷ বন বিভাগে আগতীয়াকৈ মাছ ধৰি বিক্ৰী কৰে । আন এক সূত্ৰ মতে, হাতীৰে গছকাই মাছবোৰ আঁতৰলৈ লৈ যোৱাৰ লগতে বন বিভাগে পতাহী বিলৰ যি স্থানত মাছ ধৰিবলৈ অনুমতি দিয়ে সেই স্থান খৰালিৰ দিনতো পানীৰে উপচি থকাটো ৰহস্যজনক বুলি অভিযোগ কৰে স্থানীয় ৰাইজে । শেহতীয়াকৈ আৰক্ষী প্ৰশাসনে পৰিস্থিতি নিয়ন্ত্ৰণৰ চেষ্টা কৰিছে যদিও সফল হ'ব পৰা নাই ৷

আৰু পঢ়ক :কলিয়াবৰত বন‍্যহস্তীৰ সন্ত্ৰাস