চামগুৰি, ১৯ নৱেম্বৰ: আঘোণ(Aghun)ৰ সোণোৱালী পথাৰ... চহা কৃষকৰ আশাৰে বাট চাই থাকে এই সময়খিনিলৈ । যিফালেই চকু যায়, সেইফালেই কৃষকৰ কষ্টৰ ফচল জিলিকিছে । লখিমীক আদৰি ঘৰলৈ নিয়াৰ আনন্দই সুকীয়া ।
নগাঁৱৰ(Nagaon) পুৰণিগুদামৰ মুঢ়ানীৰ পথাৰতো দেখিবলৈ পোৱা গৈছে মন পুলকিত কৰা দৃশ্য । কপালৰ ঘাম মাটিত পেলাই কৃষকে(Farmers) কৰা ধান খেতি চপাবলৈ ওলাই আহিছে দাৱনী । হাতে হাতে কাঁচি লৈ মনৰ আনন্দতে গীত জুৰি ধান দাইছে দাৱনীসকলে । জেঠ মাহৰ পৰা কৰা কষ্টৰ অন্তত সোণগুটি চপাবলৈ পাই আনন্দিত দাৱনী-কৃষকসকল ।
আঘোণৰ পথাৰত সোণগুটি চপোৱাত ব্যস্ত দাৱনী
আঘোণৰ পথাৰত গাঁৱৰ দাৱনীসকলৰ এই অকৃত্ৰিম আনন্দ-উল্লাস দেখি মন ভৰি পৰিছে কৃষকসকলৰো । কামৰ ব্যস্ততাৰ মাজতে কৃষকে দাৱনীসকলৰ কাৰণে আনি দিয়া চাহ, জলপান, বৰটেঙা আদিৰ সোৱাদ ল'বলৈও কিন্তু পাহৰা নাই সোণগুটি চপোৱাত ব্যস্ত দাৱনীসকলে ।