মৰিগাঁও, 8 আগষ্ট : জালনোট সৰবৰাহকাৰীৰ বিৰুদ্ধে মৰিগাঁৱত আৰক্ষীৰ অভিযান ৷ পলায়ন কৰিবলৈ চেষ্টা কৰা দুই জালনোট ব্যৱসায়ীক কৰায়ত্ব কৰিবলৈ গুলীচালনা মৰিগাঁও আৰক্ষীৰ অভিযান কাৰী দলৰ । মৰিগাঁও আৰক্ষীৰ নৈশ অভিযানত জব্দ ১৩,৪০,০০০ জালনোট । এই সফল অভিযানৰ নেতৃত্ব দিয়ে মৰিগাঁৱৰ আৰক্ষী অধীক্ষক ডঃ নন্দ সিং বৰকলাই ।
শনিবাৰে নিশা মৰিগাঁৱৰ আৰক্ষী অধীক্ষক ডঃ নন্দ সিং বৰকলাৰ নেতৃত্বত মৰিগাঁও জিলাৰ মিকিৰভেটা আৰক্ষী থানাৰ অন্তৰ্গত লাওতলী গাঁৱত চলোৱা হয় অভিযান । মৰিগাঁৱৰ আৰক্ষী অধীক্ষকসহ এটা অভিযানকাৰী দলে গোপন সূত্ৰৰ ভিত্তিত জালনোট ব্যৱসায়ী চক্ৰৰ বিৰুদ্ধে অভিযান চলায় লাওতলী গাঁৱত । আৰক্ষীৰ সম্ভেদ পাই দুৰ্বৃত্তৰ চক্ৰটোৱে পলাবলৈ চেষ্টা কৰাত গুলীচালনা কৰিবলৈ বাধ্য হয় অভিযানকাৰী আৰক্ষীয়ে । দুজন জালনোট প্ৰস্তুতকাৰীক আটক কৰিবলৈ সক্ষম হয় আৰক্ষীৰ দলটো ৷