মৰিগাঁও,15 জুন : কৃষ্টি সংস্কৃতিত চহকী তিৱাসকলৰ কৌটিকলীয়া লোকপৰম্পৰা শনিপূজা । অতি প্ৰাচীন লোকবিশ্বাস বিজড়িত হৈ আছে এই জেঠমহীয়া শনিপূজাৰ সৈতে । মধ্য অসমৰ তিৱাসকলৰ প্ৰচলিত জনবিশ্বাস অনুসৰি প্ৰতিবছৰৰ জেঠ মাহৰ শেষৰটো শনিবাৰে উদযাপন কৰা হয় এইভাগ বিশেষ পূজা ।
জনবিশ্বাস মতে জেঠৰ শেষৰ ফালে পানী বাঢ়ে বোৱতী নদ নদীসমূহত । সেয়ে গঞা সকলে সমবেত হৈ জেঠমাহৰ শেষৰটো শনিবাৰে বৰনামঘৰৰ প্ৰাংগণত খলপটুৱাৰে বিশেষ আকৃতিৰ দিঙা সজাই পুষ্প সজ্জিত কৰি, তেল-সেন্দুৰ ঘহি,ধুপধূনা,পাণ তামোল,দানদক্ষিণাৰ লগতে এযোৰ পাৰ চৰাই এৰিদি গাঁওবাসীৰ অপায় অমংগল নাশৰ বাবে ইষ্টদেৱতাক সেৱা জনাই উটুৱাই দিয়ে বোৱতী নদীত । সমান্তৰালভাৱে ভকত-বৈষ্ণৱ সকলে নামকীৰ্তন কৰি নদীৰ পাৰতে পশ্চিম মূৰীয়াকৈ সেৱা কৰি তামোল পাণ আৰু এখন শৰাই নদীৰ পাৰত থৈ হাবি বনৰে ঢাকি থৈ আহে। মাহপ্ৰসাদো নদীৰ পাৰতে গ্ৰহণ কৰি ঘৰাঘৰি হয় ।
উল্লেখযোগ্য যে, গাঁওখনৰ মূলনামঘৰৰ পৰা চাৰিজনে এই দিঙা নদীৰ পাৰলৈ নিওতে গঞাই পদুলি মুখত অৰিহণা আৰু ধূপদ্বীপৰে সেৱা লয় । দিঙা লৈ যোৱা ভকত বৈষ্ণৱ তথা মেধি দেউৰীসকলে আৰ্শীবাদ দি আটাইৰে কুশল মঙ্গল কামনা কৰে । প্ৰাচীনতম এই পৰম্পৰা শনিবাৰে পৰম্পৰাগত ভাৱে সম্পন্ন কৰে মৰিগাঁৱৰ টেঙাগুৰি গাঁৱৰ তিৱাসকলে ।
