দুৰ্নীতিয়ে পাহাৰ গঢ়িছে তিৱা স্বায়ত্ব শাসিত পৰিষদে

জাগীৰোড বিধান সভা সমষ্টিৰ পাত্ৰবড়ী পকী পথৰ পৰা শলমাৰীৰ আঙুলিকাটা পথাৰলৈকে পথ নিৰ্মানৰ বাবদ তিৱা স্বায়ত্ব পৰিষদৰ পৰা পাঁচ লাখ টকাৰ উন্নয়নৰ আঁচনি ঘোষণা কৰা হৈছিল ৷ কিন্তু নিৰ্মানৰ পিছতেই চপৰা-চপৰে খহিছে পঁকী পথ ৷

মৰিগাঁও,13 জুলাইঃ তিৱা স্বায়ত্ব শাসিত পৰিষদত উন্নয়নৰ নামত বুজন পৰিমাণৰ ধন আৱন্টন হোৱাৰ পিছতো কোনোধৰণৰ উন্নয়নে স্পৰ্শ কৰা নাই গ্ৰামাঞ্চলসমূহ ৷ গ্ৰামাঞ্চলৰ বাট-পথৰ শোচনীয় অৱস্থাই আজিও দুৰ্ভোগ ভোগাইছে সাধাৰণ ৰাইজক ৷ উল্লেখ্য যে, জাগীৰোড বিধান সভা সমষ্টিৰ পাত্ৰবড়ী পকী পথৰ পৰা শলমাৰীৰ আঙুলিকাটা পথাৰলৈকে পথ নিৰ্মানৰ নামত তিৱা স্বায়ত্ব পৰিষদৰ পৰা পাঁচ লাখ টকাৰ উন্নয়নৰ আঁচনি ঘোষণা কৰা হৈছিল ৷ কিন্তু ১৬ নং শলমাৰী সমষ্টিৰ সদস্য নৰোত্তম ডেকাই উদ্বোধন কৰা আঁচনিখনৰ অন্তৰ্গত এই পথছোৱা নিৰ্মানৰ পিছতেই চপৰা-চপৰে খহিবলৈ আৰম্ভ কৰিছে ৷

সমান্তৰালকৈ শলমাৰী গাওঁ পঞ্চায়তে বিগত বৰ্ষতে ধন আবন্টিত পথৰ নিৰ্মানকাৰ্য আধাতে সামৰিলে ঠিকাদাৰ পঞ্চায়ত প্ৰতিনিধি, তথা উন্নয়ন বিষয়াই। ফলত জৰাজীৰ্ণ পথেৰেই নিতৌ অহা-যোৱা কৰিছে ৰাইছে ৷ এইক্ষেত্ৰত ৰাইজৰ বাৰাম্বাৰ আহ্বানৰ পিছতো এই দুৰ্নীতিৰ তদন্তৰ বাবে কোনো ব্যৱস্থা গ্ৰহণ কৰা নাই মৰিগাঁৱৰ জিলা প্ৰশাসনে ৷ মুঠৰ ওপৰত গাঁওখনলৈ দুটাকৈ চৰকাৰী অনুষ্ঠানে চৰকাৰী আঁচনিৰ ধন মোকলাই দিছে যদিও একাংশ মুনাফা লোভী লোকৰ বাবেই যমৰ যাতনা ভোগকৰিবলগীয়া হৈছে সাধাৰণ ৰাইজে ৷

লগতে পঢ়ক- জম্মু কাশ্মীৰত আটক চাৰিটা সন্ত্ৰাসবাদী