বিধ্বস্ত পথে জলা কলা খুৱাইছে মৰিগাঁওবাসীক

হাজাৰ হাজাৰ কিলোমিটাৰ পথ পকীকৰণ হৈছে বুলি প্ৰচাৰ কৰা গেৰুৱা বাহিনীৰ মিথ্যাচাৰ প্ৰকৃত স্বৰূপ উদঙাইছে মৰিগাঁৱৰ এক সদা ব্যস্ত গড়কাপ্তানি পথে । বৰষুণৰ বতৰত পুখুৰী সদৃশ পানী হয় এইটো পথত ।

মৰিগাঁও, 16 ছেপ্টেম্বৰ : মৰিগাঁও জিলা গড়কাপ্তানি বিভাগৰ অধীনৰ নাওকটা- ময়নগুৰি পথে জলা কলা খুৱাইছে পথচাৰীক । মৰিগাঁও গড়কাপ্তানি বিভাগৰ অধীনৰ এই পথটোৰে দৈনিক অহা যোৱা কৰে সহস্ৰাধিক যানবাহন । ৰ'দ ঘাই বতৰত যেনে তেনে অহা যোৱা কৰিলেও বৰষুণৰ বতৰত কোনোমতেই যাব পৰা নায় পথটোৰে ৷ বৰষুণৰ বতৰত পুখুৰী সদৃশ পানী হয় এইটো পথত ।

পথটোৰ উন্নয়নৰ ক্ষেত্ৰত কাণষাৰ নাই জিলা গড়কাপ্তানি বিভাগ আৰু জনপ্ৰতিনিধিৰ । ফলত হাৰাশাস্তি সৰ্বসাধাৰণ জনতাৰ । তথাপি দৈনিক এই পথৰে উত্তৰ মৰিগাঁৱৰ লাহৰীঘাট, মৈৰাবাৰী, বৰচলা,ভূৰভন্ধা ,কুশতলী, গৰৈমাৰী, নগাবন্ধা আদি ৰাইজৰ লঘু যানবাহন, দুচকীয়া যানবাহন কৰিবলগা হয় মৰিগাঁৱলৈ । পথৰ দুৰৱস্থাৰ ফলত সংঘটিত হয় দুৰ্ঘটনা।

উল্লেখযোগ্য যে, এইপথৰে আহ যাহ কৰিবলগা হয়, মহিলা কাৰিকৰী শিক্ষা প্ৰতিষ্ঠানৰ নিৰ্মাণ সামগ্ৰী। আহ যাহ কৰিবলগা হয় ভূৰবন্ধা চিকিৎসালয়ৰ চিকিৎসক আৰু চৰকাৰী যান-বাহন তথা জৰুৰী সেৱাৰ এম্বুলেঞ্চ। মুঠৰ ওপৰত মৰিগাঁৱৰ এটা সদাব্যস্ত পথ এইটো । স্থানীয় বিধায়ক ৰমাকান্ত দেউৰী আৰু জিলা গড়কাপ্তানি বিভাগৰ কৃপাদৃষ্টি নপৰিলে এই দৰে যমৰ যাতনা ভুগি এই পথেৰে যাতায়ত কৰিব লাগিব বৃহত অঞ্চলৰ ৰাইজে ৷

লগতে পঢ়ক : অৰুণাচল প্ৰদেশৰ যুৱকক আটক কৰি শাৰিৰীক অত্যাচাৰ চীনা সৈন্যৰ